Emergjencat dhe borxhet, bashkitë i kërkojnë qeverisë më shumë para vitin e ardhshëm

Bashkitë kërkojnë më shumë para nga buxheti i shtetit vitin e ardhshëm. Në komisionin parlamentar të Ekonomisë dhe Financave u zhvillua seanca dëgjimore për buxhetin 2026 me përfaqësues të shoqatave të pushtetit vendor. Në buxhetin e vitit të ardhshëm është parashikuar që 61 bashkitë do të kenë në dispozicion 97,7 miliardë lekë nga 90 miliardë lekë.

Qeveria do t’iu japë pak më shumë se 46 miliardë lekë njësive të pushtetit vendor, ndërsa pjesën tjetër duhet ta sigurojnë vetë. Por, shoqatat dhe kryetarët e disa bashkive kërkuan në Komisionin për Ekonominë, Punësimin dhe Financat më shumë para në dispozicion.

“Kjo është e pamjaftueshme përballë detyrave që ka qeverisja lokale. Është vendosur një dysheme 1% në ligjin e financave lokale dhe ne gjithmonë kemi marrë vetëm 1%, pra duhet të rritet. Të ketë fonde shtesë për të rritur standardet apo shërbimet. Sa i takon grantit të performancës ai duhet të vazhdojë, dhe të futet si kriter edhe tek transferta e pakushtëzuar. Ka ardhur koha të rishikohet formula e transfertës së pakushtëzuar pasi kanë kaluar 10 vite nga reforma dhe kemi rezultatet e reja të censit”, deklaroi Adelina Farrici, Drejtoreshë te Shoqata për Autonominë Vendore.