Ulen komisionet për dërgesat e parave nga emigrantët

Nga Greqia, Italia, Gjermania, Britania e Madhe apo Zvicra, bashkë me 42 vendet e tjera pjesë të Tregut Unik të Pagesave në Euro, shqiptarët që do të marrin para nga fëmijët apo të afërmit në emigrim nuk do të paguajnë më shumë se 3 euro komision.

Gent Sejko, Guvernatori i Bankës së Shqipërisë, u shpreh: “Një lajm i rëndësishëm për qytetarët shqiptarë është fakti se transferimet nga vendet e BE-së dhe ato pjesë e Tregut Unik të Pagesave në Euro do të jenë shumë më të lira. Kjo do të thotë se shqiptarët që marrin para nga fëmijët apo të afërmit në emigracion nuk do të paguajnë më shumë se 3 euro komision. Kjo masë ul kostot për familjet dhe rrit transparencën në sistemin bankar, duke nxitur edhe formalizimin e remitancave”.

Pas deklaratës së ministres së Ekonomisë dhe Inovacionit, Delina Ibrahimaj, edhe guvernatori i bankës së Shqipërisë Gent Sejko konfirmon planin për reduktimin e parasë “cash”.

“Banka e Shqipërisë, në bashkëpunim me institucionet e tjera, mbështet planin për reduktimin gradual të parasë ‘cash’ në ekonomi. Ky proces do të ndihmojë në uljen e informalitetit, forcimin e sistemit financiar dhe rritjen e sigurisë për qytetarët. Shqipëria ka një potencial të madh për t’u përshtatur me teknologjitë e reja dhe për të ndjekur modelin e ekonomive europiane në këtë drejtim”, tha Sejko.

Me ekonominë që ngadalësoi në tremujorin e dytë të vitit duke u rritur me vetëm 3.5 për qind, Banka Qendrore nuk parashikon ndonjë surprizë pozitive për zgjerimin e Prodhimit të Brendshëm Bruto vitin e ardhshëm.

“Ekonomia shqiptare në tremujorin e dytë u rrit me 3.5 për qind, një ritëm më i ngadalshëm se pritshmëritë. Ne nuk parashikojmë surpriza të mëdha për vitin e ardhshëm, por fokusi ynë mbetet stabiliteti i çmimeve dhe ruajtja e ekuilibrave makroekonomikë. Është e rëndësishme që rritja të bazohet jo vetëm te ndërtimi dhe turizmi, por edhe tek degët e tjera të prodhimit”, u shpreh Sejko.

Me argumentin se politika fiskale aktuale i përgjigjet zhvillimeve në treg, Banka e Shqipërisë mbajti të pandryshuar në nivelin 2.5 për qind normën bazë të interesit për lekun.