U shtrenjtua energjia për pikat e karikimit, tregohet arsyet pse

Nga 1 nëntori, çmimi i energjisë elektrike në pikat ku karikohen automjetet elektrike do të rritet. Nga 14 lekë aktualisht, një kilovat-orë do të kushtojë 22 lekë. Në oraret e pikut (18:00–22:00 në dimër dhe 19:00–23:00 në verë) çmimi do të jetë 25.3 lekë për kilovat-orë.

Albi Gjenerali, administrator i Furnizuesit të Tregut të Lirë (FTL) shpjegon arsyet e këtij vendimi.

“Një qytetar shqiptar, kur aplikon për një lidhje të re, ka një fuqi të instaluar prej pak kilovatësh. Ndërsa një pikë karikimi ultra-fast charge është e barabartë me 25 familje. Sasia e energjisë që tërheq nga rrjeti është tepër e madhe”, tha ai.

Ndërkohë, çmimi mbetet i pandryshuar për karikimin e automjeteve elektrike në ambiente familjare ose biznese të vogla. Këto pika karikimi, të njohura si “slow charge” ose karikim i ngadaltë, me kapacitet deri në 11 kW dhe kohë karikimi që varion nga 6 deri në 7 orë, do të vazhdojnë të paguajnë 9.5 lekë/kWh për klientët familjarë dhe 14 lekë/kWh për bizneset e vogla.

“Nuk mund të jenë fashë e mbrojtur. Fashë e mbrojtur mund të jenë vetëm familjet shqiptare. Kjo është matematikë e thjeshtë. Këto pika shkaktojnë këtë dëm, dhe këto dëme diku duhet të përcillen”, tha Gjenerali.

Dy javë pas vendimit që e shtrenjton me rreth 57 për qind çmimin e energjisë në pikat e karikimit, shoqata dhe sindikata e taksive i kanë dërguar një shkresë zyrtare Entit Rregullator të Energjisë (ERE), ku kërkojnë tërheqjen nga vendimi. “Rritja aktuale krijon kosto të paabsorbuara dhe prish ekuilibrin ekonomik”, thuhet në shkresën ku në dijeni vihet edhe kryeministri Edi Rama.

“Vendimin për rritjen e çmimit të energjisë elektrike për pikat e karikimit e ka marrë ERE. Ne, si kompani, jemi të detyruar ta zbatojmë. Ne kemi detyrimin të tregojmë se këto pika i shkaktojnë rrjetit kosto. Pastaj është ERE që merr në konsideratë kërkesën tonë dhe shqyrton tarifat, duke dëgjuar edhe kërkesat e palëve të treta”, tha Gjenerali.

Sipas të dhënave nga Drejtoria e Përgjithshme e Shërbimeve të Transportit Rrugor (DPSHTRR), aktualisht në vend ka rreth 8 mijë automjete tërësisht elektrike dhe rreth 6500 të tjera hibride, me naftë ose benzinë dhe energji elektrike.