Shqipëria në SEPA, ja sa paguajmë sot për transfertat jashtë vendit

Duke nisur nga 7 tetori, Shqipëria është bërë pjesë e zonës unike të pagesave në euro, njohur ndryshe si SEPA. Kjo do të thotë se të gjitha transfertat për jashtë vendit, si edhe për paratë që mbërrijnë në Shqipëri në rrugë zyrtare, komisionet do të jenë shumë herë më të ulëta edhe më të shpejta.

Kështu, për pagesat me vlerë deri më 20 mijë euro, maksimumi i komisionit është 2 euro. Për shumat deri në 100 mijë euro, paguhet si komision 0.01% të vlerës dhe për shuma mbi 100 mijë, maksimumi që mund të paguhet si komision është 25 euro. Ndërkohë që për transaksionet në mbërritje nga vendet SEPA, maksimumi që mund të paguhet si komision është 3 euro.

Le ti shohim këto pagesa të konkretizuara në një shembull për ta kuptuar më thjeshtë:

Përpara datës 7 tetor, nëse një emigrant shqiptar do të sillte pranë familjes në atdhe një shumë prej 400 euro, ai do t’i paguante bankës si komision një shumë prej 47 euro. Ndërkohë që sot, pas anëtarësimit të Shqipërisë në SEPA, ai paguan vetëm 1 euro komision.

Banka e Shqipërisë ka qenë aktori kryesor në procesin e anëtarësimit të Shqipërisë në SEPA. Një rrugëtim jo i lehtë, që kërkonte përshtatjen e infrastrukturës bankare dhe jo vetëm dhe që tani është një realitet për shqiptarët.