Sa lekë harxhojmë për duhan dhe alkool? Edukimi dhe shëndetësia mbeten në plan të dytë, pas “veseve”

Të dhënat më të fundit për shpenzimet mujore mesatare të familjeve shqiptare tregojnë një panoramë domethënëse mbi prioritetet ekonomike dhe sociale. “Scan Intel” ka analizuar shifrat për të kuptuar se sa shpenzojnë familjet shqiptare dhe si ndahen këto shpenzime? Nga totali prej 93 mijë lekësh në muaj, një pjesë e konsiderueshme e buxhetit familjar vazhdon të shkojë për pije alkoolike dhe duhan, me 3,914 lekë në muaj, shumë më e lartë se ajo që u dedikohet arsimit apo kulturës dhe argëtimit.

Në total, familjet shqiptare që regjistrohen në rreth 755 mijë sipas Censit, shpenzojnë për pije alkolike dhe duhan gati 3 miliardë lekë në muaj, ose 35 miliardë lekë në një vit. E konvertuar kjo shifër rezulton në rreth 350 milionë euro në një vit.

Në kontrast, për arsim shpenzohen vetëm 3,081 lekë në muaj nga një familje, ndërsa për argëtim dhe kulturë edhe më pak, 2,460 lekë. Kjo tregon se investimi në zhvillimin intelektual e kulturor të familjeve shqiptare mbetet i kufizuar, ndërkohë që shpenzimet për zakone të dëmshme si duhani dhe alkooli vijojnë të mbeten të larta.

Edhe shpenzimet për shëndetin, me vetëm 3,507 lekë në muaj, tregojnë një realitet të ngurtë, kujdesi për mirëqenien mbetet në kufijtë minimalë. Duke pasur parasysh kostot e barnave dhe shërbimeve mjekësore, kjo shumë është shumë e ulët për të përballuar nevoja reale. Kjo nënkupton ose një mungesë aksesi ndaj kujdesit shëndetësor cilësor, ose një neglizhencë të vetë familjeve për të investuar në shëndetin e tyre./Tv Scan