LIGJET E BIZNESIT
Agjencia ndërkombëtare e lajmeve Reuters ka raportuar mbi gjendjen aktuale të lumit Vjosë dhe përpjekjet për ta mbrojtur atë pas shpalljes së luginës si Rezervë e Biosferës nga UNESCO, një status që synon ruajtjen e ekosistemeve të rralla dhe të brishta të planetit.
Në artikullin e publikuar muajin e kaluar, Reuters përshkruan se si era e fortë shpesh përhap copa plastike nga vendgrumbullimet e hapura të mbeturinave në ujërat e lumit, ndërsa në pjesë të tjera shkarkohen ujëra të zeza ose nxirret zhavorr nga shtrati i lumit, një praktikë që ekspertët e konsiderojnë të dëmshme për rrjedhën natyrore dhe stabilitetin e brigjeve.
Pavarësisht statusit të ri mbrojtës, ambientalistët mbeten të shqetësuar. “Dokumentet ndërkombëtare të njohjes si UNESCO nuk i zgjidhin problemet,” tha për Reuters Besjana Guri nga organizata mjedisore Lumi, gjatë një vizite të fundit në luginë.
Reuters citon gjithashtu ministrin shqiptar të Mjedisit, Sofjan Jaupaj, i cili pranoi vështirësitë ekzistuese dhe deklaroi se qeveria planifikon të investojë mbi 150 milionë euro për përmirësimin e trajtimit të ujërave të zeza dhe mbylljen e deponive të hapura përgjatë lumit.
Lumi Vjosë, që buron në Greqinë veriore dhe derdhet në Adriatik, njihet si një nga rrjedhat e fundit të pandërprera ujore në Evropë. Ai është shpallur Park Kombëtar në vitin 2023, dhe është shtëpi për qindra specie të rralla, përfshirë vidrën dhe shkabën egjiptiane të kërcënuar.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Sipas Reuters, ndonëse statusi i UNESCO-s përfaqëson një arritje të rëndësishme për Shqipërinë, sfidat për ruajtjen e pastërtisë dhe ekuilibrit natyror të lumit mbeten të mëdha.
