Qiratë e larta rrisin koston e jetesës në vend, inflacioni rritet në 2.4% në shtator

Rritja e qirave, për shkak edhe të nisjes së vitit të ri akademik e ka bërë më të shtrenjtë jetesën në vend. Instituti i Statistikave ka konstatuar se në shtator, inflaiconi arriti në 2.4% nga 1.9% që ishte në të njëjtën periudhë të një viti më parë. Të dhënat e detajuara tregojnë se rritja e kostos së jetesës muajin e kaluar është ndikuar kryesisjht nga qiratë, por jo vetëm. Presion rritës kanë ushtruar edhe ushqimet, si dhe grupet e tjera.

Ndikimi i grupeve kryesore në inflacion

Rritja vjetore e çmimeve në muajin Shtator është ndikuar kryesisht nga grupi “Qira, ujë, lëndë djegëse dhe energji” me +0,83 pikë përqindje, pasuar nga grupi“Ushqime dhe pije joalkoolike” me +0,63 pikë përqindje. Gjithashtu, çmimet e grupit “Mobilje, pajisje shtëpie dhe mirëmbajtje e shtëpisë” ndikuan me +0,19 pikë përqindje, çmimet e grupit “Pije alkoolike dhe duhan” me +0,17 pikë përqindje, çmimet e grupit “Hotele, kafene dhe restorante” me +0,14 pikë përqindje, çmimet e grupit “Argëtim dhe kulturë” me +0,11 pikë përqindje, çmimet e grupit “Mallra dhe shërbime të ndryshme” me +0,08 pikë përqindje, çmimet e grupit “Shërbimi arsimor” me +0,07 pikë përqindje, çmimet e grupit “Veshje dhe këpucë” me 0,04 pikë përqindje, çmimet e grupeve “Transporti” dhe “Komunikimi” me +0,03 pikë përqindje secili dhe çmimet e grupit “Shëndeti” me +0,02 pikë përqindje.