LIGJET E BIZNESIT
Zv.kryeministrja, njëherësh ministre e Infrastrukturës dhe Energjisë, Belinda Balluku inspektoi punimet në kantierin e autostradës Tiranë-Durrës. Sipas ecurisë së punimeve, Balluku u shpreh se loti i parë do të jetë i hapur për qarkullimin e makinave deri në fund të muajit dhjetor.
“Ndodhemi në një nga kantieret që po ecin më mirë për të thënë të drejtën, në të gjithë Shqipërinë, që është kantieri i autostradës Tiranë-Durrës. Ndodhemi në fazën e dytë të këtij kantieri. Faza e parë ka një ecuri të mirë të qëndrueshme 65% ndërkohë që faza e dytë ka 80% ecuri. Tashmë autostrada Tiranë-Durrës, në 6 km e parë, duke nisur nga Casa Italia, dhe deri në mbikalimin e Kasharit kthehet në një autostradë të tipit A, me një kurorë prej 32.5 m gjerësi. Kemi tre korsi nga të dyja krahët plus një korsi emergjence që e bën me 4 korsi nga të dyja krahët. Ecuria e projektit është shumë e mirë. Pra, faza e parë është 65% ecuria dhe në fazën e dytë 85%. Domethënë ne shpresojmë që për festat e fundvitit ta kemi dorëzuar, pavarësisht se afati kontraktual është shtatori i vitit 2026″, –u shpreh Balluku.
Ndërkohë, ARRSH ka nisur përgatitjet edhe për për gjelbërimin si dhe arredimin urban të kësaj autostrade. Sipas zëvendëskryeministres Balluku, do të ketë edhe një ndryshim brenda tuneleve të Shqiponjës përsa i përket arredimit duke qenë se është hyrja kryesore e Tiranës.
