CEEMAN sjell në Shqipëri eventin ndërkombëtar të arsimit: Roli i shkollave të biznesit në një rend të ri botëror

Nesër dhe pasnesër (24 dhe 25 shtator) Shqipëria do të mirëpresë një ngjarje të rëndësishme ndërkombëtare në fushën e arsimit. Shoqata Ndërkombëtare për Zhvillimin e Menaxhimit në Shoqëritë Dinamike (CEEMAN) në bashkëpunim me Avis Albania organizon Konferencën e 33-të Vjetore (CAC33) me temë “Roli i shkollave të biznesit në një rend të ri botëror”.

Ky takim që do të zhvillohet në Durrës, pritet të mbledhë dekanë, ekspertë të arsimit, liderë të mendimit nga e gjithë bota, si dhe përfaqësues të lartë të qeverisë shqiptare për të diskutuar mbi rolin që po marrin shkollat e biznesit në një botë gjithnjë e më të ndërlidhur.

Nga një rrjet rajonal në një platformë globale

E themeluar në vitin 1993, CEEMAN nisi si një nismë për të përshpejtuar cilësinë e arsimit në menaxhim në Europën Qendrore dhe Lindore. Sot, ajo është shndërruar në një rrjetin global që vepron kryesisht në tregje në zhvillim dhe në ekonomitë në tranzicion.

Duke pasur si parim bazë profesionalizmin, CEEMAN promovon inovacionin, kreativitetin dhe respektin për vlerat kulturore, duke ndihmuar individët dhe institucionet që të përballen me sfidat e reja, por edhe të ndërtojë praktika të qëndrueshme në menaxhim.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern

Ngjarja kryesore e vitit për CEEMAN

Konferenca e 33-të vjetore konsiderohet si aktiviteti më i madh i shoqatës. Programi përfshin fjalime të rëndësishme, prezantime, diskutime në tryeza të rrumbullakëta, vizita në kompani, sesione për studiues dhe pedagogë, si dhe mbledhjen e përvitshme të CEEMAN.

Në këtë event do të mbajë një fjalim edhe kryeministri i vendit, Edi Rama, i cili do të trajtojë perspektivën e vendit në krijimin e një mjedisi më konkurrues për biznesin, si dhe rolin e arsimit dhe lidershipit në nxitjen e inovacionit.

Një hapësirë për dialog dhe ide të reja

Konferenca pritet të krijojë hapësira për bashkëpunime ndërkombëtare dhe shkëmbime idesh mes akademikëve dhe drejtuesve të biznesit. Gjithashtu, pjesëmarrësit do të kenë akses në informacionet më të fundit mbi zhvillimet në menaxhimin e arsimit dhe do të eksplorojnë mundësi të reja për bashkëpunim në nivel global.