Ndryshime të reja në qeveri, ja emrat. Miratohet edhe propozimi për shkarkimin e Erion Veliaj

Ndryshime të tjera në qeverinë “Rama 4”. Këshilli i Ministrave ka emëruar Silva Caka në postin e zv.ministres së Brendshme. Caka gjatë karrierës së saj politike ka shërbyer si deputete e Kuvendit të Shqipërisë në vitet 2013-2019, pasi fitoi mandatin në qarkun e Beratit nën siglën e LSI-së.

Mësohet gjithashtu, se ndër emërimet e reja do të jetë edhe Edona Bilali në postin e zv.ministres së Infrastrukturës dhe Energjisë. Bilali ka shërbyer si Ministre e Shtetit për Mbrojtjen e Sipërmarrjes në kabinetin “Rama III”, nga 10 shtatori i 2021 deri në shtator të vitit 2023. Ajo mbeti jashtë parlamentit, pasi nuk ia doli të zgjidhej deputete në garën e 11 majit, ku ishte pjesë e listës së hapur të Partisë Socialiste, në qarkun e Shkodrës.

Po ashtu, Eugenta Tomini do të rikthehet si zv.ministre e Shëndetësisë, detyrë të cillën e ka mbajtur edhe në vitin 2021. Tomini më parë ka drejtuar edhe Institutin e Shëndetit Publik. Mësohet se në këtë mbledhje të qeverisë është miratuar edhe shkarkimi i Erion Veliajt si kryetar i Bashkisë së Tiranës.