Dy pjata dhe një vazo, grabiten sendet me vlerë mbi 9.5 mln euro në muzeun francez

Tre objekte me vlerë më shumë se 9 milionë euro u vodhën të enjten në mëngjes nga Muzeu Kombëtar Adrien Dubouché në Limoges të Francës.

Sipas agjencisë së lajmeve BFMTV, hajdutët hynë me forcë në muze pak pas orës 3:15 të mëngjesit dhe morën dy pjata dhe një vazo nga koleksioni, të gjitha me origjinë kineze. Edhe pse policia u njoftua menjëherë, hajdutët ishin larguar kur mbërritën, ndërsa zyra e prokurorit të Limoges hapi menjëherë një hetim për incidentin.

Nga ana e saj, Ministrja e Kulturës, Rachida Dati tha se forcat e rendit “po bëjnë gjithçka që munden për t’i gjetur ata”.

“E konsideroj këtë vjedhje me thyerje një sulm ndaj qytetit dhe trashëgimisë së tij kulturore”, tha kryebashkiaku i Limoges, Emile Roger Lombardi.

Vërehet se dy pjatat kineze dhe një vazo që janë klasifikuar si thesare kombëtare vlerësohen të kenë një vlerë totale sigurimi prej më shumë se 9.5 milionë eurosh, sipas muzeut.

Konkretisht, dy pjatat kineze që u vodhën janë bërë prej porcelani kinez “nga fabrika Jingdezhen”. Ato janë të zbukuruara me dekorime blu dhe të bardha dhe datojnë që nga shekujt 14 dhe 15. Jingdezhen është një qytet në Kinën lindore, i njohur për prodhimin e porcelanit të lashtë që daton më shumë se 1,700 vjet më parë, siç shpjegon UNESCO.

Sendi i tretë i vjedhur është një vazo, gjithashtu e bërë nga porcelani kinez, që daton që nga shekulli i 18-të. Vetë muzeu ka një koleksion të rëndësishëm veprash që përfaqësojnë historinë e qeramikës.