LIGJET E BIZNESIT
Në një hark kohor prej 18 muajsh, 1 shkurt 2024 – 31 korrik 2025, Universiteti i Arteve të Tiranës, mori pjesë në një nismë rajonale ndërkufitare për “Tejkalimin e kufizimeve në njohjen dhe ekuivalentimin e Programeve të Arsimit të Lartë Ndërkufitar” me akronimin UNIVALENS, mbështetur nga Programi Interreg IPA CBC – South Adriatic duke përfshirë Shqipërinë, Italinë dhe Malin e Zi.
Projekti UNIVALENS u strukturua me qëllimin:
a. për të identifikuar dhe kapërcyer pengesat proceduriale (administrative dhe ligjore) për të zbatuar Programe të përbashkëta të Arsimit të Lartë, të vlefshme e të njohura në të tre vendet e përfshira;
dhe,
b. për të realizuar praktikisht një model bashkëpunimi ndërkufitar për universitetet, ku partnerët të mund të testojnë e të zhvillojnë sëbashku një program të Arsimit të Lartë të nivelit Master, në fushën e Arteve të Performuara.
Për sa më sipër, u ngrit një partneritet mes Universitetit të Arteve Tiranë – Shqipëri, Universiteti i studimeve «Aldo Moro» Bari dhe Puglia Culture (ish Teatro Pubblico Pugliese) – Itali dhe Universiteti i Malit të Zi, Podgoricë, Mal i Zi, ku Universiteti i Arteve u caktua të jetë partneri lider i projektit.
Organizatorët ndërtuan skemën e ndërhyrjes me anë të disa tipeve të aktiviteteve të përbashkëta si Seminare, Misionet e vizitave studimore, Ëorkshope dhe Plan Veprimi të Përbashkët, të cilët u artikuluan në mënyrë të balancuar në të tre shtetet ndërkufitare të projektit UNIVALENS, duke filluar nga 7 Mars 2024 e deri në eventin përfundimtar, më 21 Korrik 2025, i cili u përmbyll edhe me një Marrëveshje mes Partnerëve të projektit, të firmosur nga tre Rektorët e Universiteteve partnere, Prof. Stefano Bronzini, Prof. Dr. Erald Bakalli dhe Prof. Dr. Vladimir Bozovic dhe Presidentit të Puglia Culture, Prof. Paolo Ponzio, si edhe një koncert, ku u luajt Trio Nr. 1 Op. 49 në re minore e Mendelssohn nga Marija Djuranovic (violinë – Mal i Zi), Pjetër Guralumi (violoncel – Shqipëri) dhe Mariacristina Buono (Piano – Itali) si një provë reale e mundësive të shtuara për artistët e të tre shteteve, në një kontekst të ofertave të reja ndërkufitare në fushën e menaxhimit artistik dhe aftësimit të të rinjve të Adriatikut Jugor për të qenë në gjendje të krijojnë produkte artistike që t’u përgjigjen edhe nevojave të bashkëpunimit artistik.
Misionet e vizitave studimore faktmbledhëse
Për të realizuar një prej vizitave studimore e faktmbledhëse, fillimisht në mjediset e Universitetit të Arteve u mblodhën në datat 13-14 Maj të vitit të kaluar delegacione nga Italia e Mali i Zi ku u trajtuan procedurat shqiptare për për organizimin, hapjen, akreditimin dhe njohjen e një programi studimi të ciklit të dytë Master në zonën e Adriatikut Jugor që lidhet me Menaxhimin e Artit dhe Marketingun e Arteve të Performuara.
Përgjatë punimeve të ditës së parë të vizitave studimore faktmbledhëse, ofruan ekspertizën e tyre specifike të fushës edhe përfaqësueset e Ministrisë së Arsimit dhe Sportit, znj. Ingrit Jushi dhe znj. Ardjana Gjini, përfaqësueset e Agjencisë së Sigurimit të Cilësisë në Arsimin e Lartë, znj. Majlinda Demirneli dhe znj. Ersi Dako, përfaqësuesi i Agjencisë Kombëtare të Kërkimit Shkencor dhe Inovacionit, z. Robert Dumi.
Në ditën e dytë të punimeve, nderuan dhe mbështetën me praninë e tyre autoritetet drejtuese të kulturës në Shqipëri duke filluar nga Zv. Ministrja e Ministrisë së Ekonomisë, Kulturës dhe Inovacionit, znj. Lira Pipa, Drejtori i Teatrit Eksperimental “Kujtim Spahivogli”, z. Gjergj Prevazi, Drejtori i Teatrit Kombëtar, Drejtori i Agjencisë së Industrisë Kreative, si dhe përfaqësuesi i Zyrës së Rajonit të Pulias në Tiranë, z. Claudio Polignano.
Workshopi
Nga një pikë vështrimi tjetër erdhi Ëorkshopi me afro 50 artistë e profesionistë të rinj të sektorit të Arteve të Performuara nga qytete të ndryshme të Shqipërisë të cilët u bënë pjesë e një punëtorie të përbashkët të drejtuar nga partnerët e UNIVALENS. Ndërhyrjet përmes prezantimeve dhe debateve të drejtpërdrejta me folësit: Prof. Asoc. Alert Celoaliaj – Përgjegjës i Departamentit të Regjisë së Teatrit dhe Televizionit, Prof. PhD. Edin Jasarovic – Dekan i Fakultetit të Artit Dramatik Cetinjë, (Mal i Zi), Sara Jovanovic – Zv. Dekane për Marrëdhëniet Ndërkombëtare dhe Shkencën, Lino Manosperta – projekt manaxher për Puglia Culture dhe Sandro Furio – expert Puglia Culture, Prof. Asoc. Federico Zecca nga DAMS i Universitetit të Studimeve “Aldo Moro” Bari, Itali, bënë që në pjesën fundit të ëorkshopit të ishin më të qartë lidhur me sfidat dhe zhvillimet e reja drejt programeve të dyfishta në Artet e Performuara; me proceset e ndërkombëtarizimit të studimeve në Sistemin e Arsimit të Lartë Shqiptar; si dhe rastet e mundshme të studimeve të dyfishta: rastet e Shqipërisë dhe Malit të Zi. Në mënyrë të veçantë, Z. Lino Manosperta u fut në debate logjike dhe analiza konkrete me të rinjtë artistë duke stimuluar një mënyrë të menduari proaktive, sidomos duke prezantuar mënyrën e menaxhimit të teatrove të Rajonit të Puglias, në të cilët, nga 1euro e investuar, arrihet të përfitohen 8 euro, një raport midis investimit dhe realizimit final të produktit, mjaft afër një koncepti biznesi të pastër, për të cilin, zgjerimi i bazës së përfituesve të produktit teatror, është tashmë një e dhënë e pranuar nga të gjithë.
