Publikohen referencat e reja të pronës, cmimet në jug rriten me 100%. Ja ku është më shtrenjtë

Qeveria ka publikuar listën me referencat e reja të pronave, që do të hyjnë në fuqi nga 1 janari 2026. Projektvendimi i Ministrisë së Financave që është hedhur për konsultim publik përcakton se referencat më të larta janë për Ishullin e Sazanit në Vlorë dhe “Zona 13” në Durrës. Këto do të shndërrohen edhe në zonat më të shtrenjtat në rang vendi për të blerë një apartament, pas Tiranës.

Një metër katror ndërtim në këto zona do të kushtojë plot 2 mijë euro. Ndërtimi i resorteve turistike nga dhëndri i Presidentit amerikan Donald Trump dhe zhvillimi i Portit të Marinës së Jahteve nga biznesmeni arab Mohamed Alabbar janë arsyet. Zona e plazhit në Himarë renditet e treta me 1 400 euro për metër katrorë, ndjekur nga zonat 6 dhe 1 në Durrës apo 1 dhe 3 në Sarandë.

Çmimi i referencave rritet edhe në Kamëz, në 750 euro për metër katror dhe Tale të Lezhës në 700 euro m2.

Ministria e Financave ka hedhur në konsultim publik çmimet e reja referencë, në mbarë vendin me përjashtim të Tiranës si qytet. Qendra e Durrësi shtrenjtohet në 1 mijë deri në 1 400 euro nga 472 euro aktualisht. Rritja përllogaritet në 528 deri në 928 euro.

Çmimet referencë të banesave rriten edhe në  Fier. Nga rreth 530 euro aktualisht, prej vitit të shkuar një metër katror në këtë qytet do të kushtojë 620 euro… 16,76% më tepër.

Ngjashëm çmimet referencë do të shtrenjtohen edhe në Berat nga 1 janari 2026.

Mungesa e referencave të pronave për të gjitha bashkitë e vendit u bë shkak edhe për shtyrjen e rivlerësimit të pasurive të paluajtshme të parashikuar për të ndodhur gjatë vitit 2024 e deri në verën e këtij viti.