LIGJET E BIZNESIT
Ndonëse larg gjeografikisht, konflikti Izrael-Iran, por jo vetëm, edhe vijimi i luftës Rusi-Ukrainë janë një kërcënim real edhe për ekonominë shqiptare. Konstatimin e ka bërë Banka e Shqipërisë në deklaratën për shtyp pas mbledhjes së fundit të Këshillit Mbikëqyrës. Sipas autoritetit mbikëqyrës bankar, situata gjeopolitike do të monitorohet, pasi pasiguria globale është rritur, duke krijuar rreziqe potenciale si për perspektivën e rritjes ekonomike, ashtu edhe për dinamikat e inflacionit.
“Balanca e rreziqeve për inflacionin mbetet simetrike në afatin e mesëm. Në veçanti, tensioni gjeopolitik dhe vijimi apo intensifikimi i luftërave tregtare janë rreziqe të kahut të sipërm për inflacionin, ndërkohë që rënia e inflacionit në Eurozonë dhe një ecuri më e dobët e ekonomisë së saj në raport me pritjet përbëjnë rreziqe të kahut të poshtëm.
Nga ana tjetër, qëndrueshmëria në nivele të ulëta e inflacionit të huaj dhe të atij jobazë, vijojnë të gjenerojnë nivele më të ulëta inflacioni në raport me pritjet tona dhe paraqesin rreziqe të kahut të poshtëm në afatin e shkurtër”, theksohet në deklaratën për shtyp të Bankës së Shqipërisë.
Autoriteti mbikqyrës bankar thekson se vendimet e ardhshme të politikës monetare do të kalibrohen me të dhënat e reja dhe zhvillimet me faktorët e riskut.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
