LIGJET E BIZNESIT
Nga Aurora Sulce, Producente Ekzekutive për Biznesin në A2 CNN
Qeveria ka bërë publik planin për rritjen e pensioneve, të premtuar gjatë fushatës elektorale. Janë një sërë masash që do të merren, duke filluar nga ky vit deri në fund të mandatit të katërt, të parashikuara në Dokumentin Politik për Moshimin dhe Planin e Veprimit 2025-2030. Cfarë parashikon drafti?
Qeveria planifikon të rrisë pensionin mesatar në qytet nga rreth 18 mijë lekë që është aktualisht në mbi 27 mijë lekë. Pra, një rritje rreth 9 mijë lekë për katër vite. Ndërsa për pensionin mesatar në fshat, rritja do të jetë rreth 5 mijë lekë deri në vitin 2030.
Plani i qeverisë parashikon edhe disa ndërhyrje të tjera.
Kështu, parashikohet dhënia e e një pensioni të 13-të për të gjithë pensionistët. Do të ketë rritje me 100% të pensionit social, nga 100 euro që është aktualisht në 200 euro. Gjithashtu, do të ndryshojë mënyra e indeksimit, pasi do të shkohet drejt indeksimit vjetor të diferencuar, pra në varësi të vlerës së pensionit dhe jo i njëjtë për të gjithë, sic bëhet aktualisht.
Por plani i qeverisë nuk parashikon vetëm lajme të mira. Kjo pasi do të ketë edhe një rritje të moshës së daljes në pension. Kjo do të thotë se të gjithë duhet të punojmë më gjatë.
Aktualisht gratë dalin në pension 61 vjeç e 10 muaj, ndërsa burrat dalin 65 vjeç. Për gratë mosha rritet me 2 muaj çdo vit, ndërsa për burrat rritja do të nisë në vitin 2032, me qëllim që në vitin 2056 mosha e pensionit të jetë 67 vjeç për të dyja gjinitë.
