Mbi 3.4 milionë të huaj në 5 muaj, jo vetëm për turizëm

Mbi 3.4 milionë të huaj kanë hyrë në Shqipëri në pesë muajt e parë të këtij viti. Të dhënat e Institutit të Statistikave flasin për 3.9% më shumë se në të njëjtën periudhë të një viti më parë.

Muajt janar dhe shkurt nisëm mirë, me rritje përkatësisht 14.5 dhe 7.4%, ndërsa në mars hynë 2.7% më pak të huaj. Tendenca u përmirësua lehtë në prill me 3.15%. INSTAT sakaq raporton se në vend hynë 987.077 shtetas të huaj në maj. Ky numër është rritur me 1,4 %, krahasuar me të njëjtën periudhë të vitit 2024.

Shifrat tregojnë se ritmet e rritjes së turistëve janë ngadalësuar ndjeshëm në muajt e parë të këtij viti. Në maj të një viti më parë, në vend kishin hyrë 38% më shumë të huaj.

INSTAT konstaton se në maj të këtij viti, 95 % e hyrjeve të shtetasve të huaj në Shqipëri janë nga rajoni i Evropës. Evropa Jugore zë 72 % të hyrjeve të shtetasve të huaj nga kontinenti Evropian, ndjekur nga Evropa Perëndimore me 14 %.

Qëllimi i hyrjes në territorin shqiptar i shtetasve të huaj, në 98 % të rasteve është për qëllime personale, ku dominojnë hyrjet për pushime, vizitë tek të afërm, etj. Në maj të këtij viti, ky tregues ka shënuar një rritje me 0,9 %, krahasuar me të njëjtën periudhë të një viti më parë. Hyrjet e shtetasve të huaj për qëllime Biznesi dhe profesionale janë rritur me 26.1 %.