Gratë humbin terren në biznes, më pak ndërmarje të drejtuara prej tyre

Biznesi mbetet domen i burrave në Shqipëri. Të dhënat e fundit të Institutit të Statistikave tregojnë se është pakësuar numri i grave që drejtojnë ndërmarrje në vendin tonë.  Sipas INSTAT, gjatë vitit 2024 në vend kanë operuar rreth 113 mijë ndërmarrje aktive të vogla, me 1 deri në 4 punonjës, duke treguar se natyra e sipërmarrjes në Shqipëri mbështetet në biznesin e vogël. Rreth 32.5%, rezultojnë të jenë të drejtuara nga gra, çka nënkupton se më pak se gjysma e bizneseve të këtij formati janë në pronësi apo drejtim femëror.

Tendenca e uljes së numrit të ndërmarrjeve të drejtuara nga gratë bëhet edhe më e theksuar me rritjen e numrit të punonjësve. Ndërmarrjet me 5 deri në 9 punonjës janë rreth 9,300 në total, por vetëm 24.8% prej tyre drejtohen nga gra, duke konfirmuar një tjetër nivel të ulët të përfaqësimit të tyre në strukturat drejtuese. Po ashtu, për bizneset me 10 deri në 49 punonjës, gratë sërish ishin më të pakta në drejtim me vetëm 23.3%

Në vitin 2024, në Shqipëri kanë qenë aktive vetëm 2,020 ndërmarrje me më shumë se 50 punonjës. Nga këto, vetëm 25.9% kanë pasur drejtuese femra, një shifër që tregon qartë një prani shumë të ulët të grave në krye të bizneseve të mëdha.

Pjesëmarrja më e lartë e grave në drejtimin e ndërmarrjeve vërehet në sektorin e “Shërbimeve të tjera”, ku gratë përfaqësojnë 40.9% të drejtuesve. Në vend të dytë renditet sektori i tregtisë, ku gratë zënë 33,9% të pozicioneve drejtuese.

Këto të dhëna tregojnë qartë dy prirje kryesore në peizazhin e biznesit shqiptar, dominimin e ndërmarrjeve të vogla dhe pabarazinë e theksuar gjinore në drejtim, veçanërisht në nivelet më të larta të sipërmarrjes.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern