LIGJET E BIZNESIT
Qeveria do të vendosë në shërbim të fermerëve një garanci sovrane prej 3 miliardë lekësh, për të lehtësuar aksesin e tyre në financë. Thënë ndryshe, për ta bërë më të lehtë marrjen e një kredie prej tyre.
Ministri i Financave, Petrit Malaj dhe Ministrja e Bujqësisë dhe Zhvillimit Rural, Anila Denaj zhvilluan një takim të përbashkët me drejtuesit e bankave të nivelit të dytë dhe përfaqësuesit e Shoqatës së Bankave për të diskutuar mbi aspektet teknike të zbatimit e kësaj Garancie Sovrane për sektorin e bujqësisë, të miratuar së fundmi nga qeveria shqiptare.
Normat që parashikohen për këtë skemë do të jenë tejet të favorshme dhe me mbulim deri në 70% të principalit të kredisë, shuma e së cilës nuk do të kalojë 25 milionë lekë për secilin prej subjekteve aplikuese.
Ndërmarrjet e Vogla dhe të Mesme do të kenë mundësi që këtë Garanci Sovrane ta kombinojnë edhe me produktin e Bankës së Shqipërisë duke përfituar më shumë mundësi dhe një akses më të madh financiar me fokus investimet që rrisin kapacitetin dhe cilësinë prodhuese në agropërpunim, modernizimin e mekanikës bujqësore, agroturizëm, peshkim, akuakulturë etj..
Kjo është Garancia e pestë Sovrane që qeveria shqiptare vë në dispozicion të sipërmarrjeve private, si një mundësi për likuiditet të shtuar, me shtetin si garantues.
