Shqipëria do të bëjë identifikimin elektronik të kafshëve

Një zhvillim historik për Shqipërinë është përshëndetur zyrtarisht nga një prej organizatave më të fuqishme të mjekëve veterinarë në Europë. UEVP – Unioni Europian i Veterinerëve të Praktikës, me seli në Bruksel, ka vlerësuar si një hap madhor dhe strategjik marrëveshjen mes Autoritetit Kombëtar të Veterinarisë dhe Urdhrit Profesional të Mjekut Veterinar të Shqipërisë, për identifikimin dhe regjistrimin e kafshëve të shoqërimit.

UEVP thekson se kjo marrëveshje vendos Shqipërinë në rrugën e duhur drejt përafrimit me standardet europiane, duke krijuar një sistem të gjurmueshëm, të sigurt dhe të mbështetur ligjërisht për mikroçipimin dhe pasaportimin e qenve dhe maceve.

Vetëm veterinerë të licencuar do të kenë të drejtën të çipojnë dhe pasaportojnë

Marrëveshja e firmosur më 30 prill 2025 nga presidenti i UPMVSH, Dr. Ervin Resuli, dhe drejtori i përgjithshëm i AKVMB, z. Sulejman Kulolli, parashikon që vetëm profesionistë të licencuar nga Urdhri do të kenë të drejtën ligjore të ushtrojnë këtë shërbim.

Ky sistem jo vetëm që garanton mirëqenie për kafshët, por mbron edhe shëndetin publik, duke ndihmuar në kontrollin e sëmundjeve të rrezikshme zoonotike si:

tërbimi, lehismaniaza, echinokokoza dhe toksoplasmoza.

Një sinjal i fortë për BE-në dhe rajonin

Për UEVP-në, kjo marrëveshje është një shembull konkret i funksionimit të modelit europian në Shqipëri, ku Urdhri i Veterinerëve luan rolin e vet rregullator dhe garantues të standardeve të profesionit.

Ky është një zhvillim që ndodh vetëm pak muaj pas pranimit të UPMVSH si anëtare me të drejta të plota në UEVP, duke i dhënë Shqipërisë një zë të respektuar në tryezat europiane të vendimmarrjes veterinare.

“Shqipëria nuk është më jashtë sistemit, por pjesë aktive e tij. Marrëveshja AKVMB–UPMVSH është një model për të gjithë rajonin”, – thekson publikimi i UEVP.