Po ndikojnë turistët, pagesat me kartë po rriten edhe këtë vit

Shqiptarët po paguajnë më shpesh me kartë. Në tre muajt e parë të vitit u shpenzuan rreth 134 miliardë lekë në rrugë bankare. Faktori kryesor që po nxit rritjen e pagesave me kartë është zgjerimi bazës së bizneseve që pranojnë pagesa të tilla, nxitur nga turizmi.

Për të tërhequr para, shlyer faturat apo për të blerë ushqime në supermarket, qytetarët shqiptarë dhe turistët e huaj kryen gati 12 milionë transaksione në rrugë bankare në tre muajt e parë të vitit. Të dhënat nga Banka e Shqipërisë tregojnë se gati gjysma e totalit të veprimeve elektronike janë për pagesa me kartë.

“Lajmi më i mirë është fakti që shqiptarët kanë filluar të vlerësojnë kohën edhe përdorimin në mënyrë sa më eficente të kohës së tyre. Kjo përkthehet në më shumë produkte digjitale të pagesave, që kanë ekzistuar prej vitesh”, thotë ekspertja e sistemit të pagesave Bora Feri.

Në linjë të njëjtë me shtimin e pagesave ka shkuar edhe vlera e shpenzuar, e cila për 3-mujorin e parë të vitit përllogaritet në rreth 134 miliardë lekë. Kjo shifër është më e larta që kur në vend nisi përdorimi i kartave bankare.

“Ka akoma shumë për të bërë në këtë drejtim. Në mënyrë që të bëjë sens përdorimi i kanaleve bankare të pagesave duhet të ketë një koncentrim të të gjithë aktorëve në treg që nis me konsumatorin e përfundon me rregullatorin apo anasjelltas”, shpjegon Bora Feri.

Sipas ekspertëve, faktori kryesor që po nxit rritjen e pagesave me kartë është zgjerimi bazës së bizneseve që pranojnë pagesa të tilla, nxitur nga turizmi. Të dhënat nga Banka Qendrore tregojnë se numri i terminaleve për pagesa elektrike në fund të marsit arriti në mbi 25 mijë, nga rreth 24 mijë fund-vitin e shkuar.

“Tregu në Shqipëri vijon ta perceptojë përdorimin e kartës si diçka që i takon një shtrese të caktuar. Këtu ka nevojë për këshillim nga të gjithë aktorët. Nuk është faji i konsumatorëve”, thekson Feri.

Të paguash me kartë është tashmë një rutinë për konsumatorët në ekonomitë e zhvilluara. Në Shqipëri jemi ende shumë larg këtij realiteti, megjithëse vitet e fundit po dekurajohen pagesat “cash”.

Sipas të dhënave nga Banka e Shqipërisë vitit të shkuar, u regjistruan mesatarisht 23 pagesa për frymë në mënyrë elektronike.