LIGJET E BIZNESIT
Dinamikat në tregun e sigurimeve nuk kanë ndryshuar përsa i përket orientimit të tregut. Të dhënat e Autoritetit të Mbikëqyrjes Financiare tregojnë se në tremujorin e parë të këtij viti, 67.82% e tregut përbëhej nga sigurimi i automjeteve, një shërbim i detyrueshëm me ligj. Ndërkohë që sigurimi i jetës dhe shëndetit zonte 16.4% të tregut dhe sigurimi I pronës vetëm 15.77%.
Janë një sërë faktorësh që ndikojnë në një ndarje të tillë të tregut, duke filluar nga niveli i ulët i kulturës së të siguruarit; niveli i ulët i të ardhurave, por edhe mungesa e besimit. Shqipëria renditet ndër vendet me nivelin më të ulët të të siguruarit për frymë në rajon dhe sipas kompanive, ky ëhstë problem që pengon zhvillimin e tregut dhe diversifikimin e produkteve për qytetarët.
Zhvillimet e tregut të sigurimeve
Sipas të dhënave të Autoritetit të Mbikëqyrjes Financiare, të ardhurat nga primet e shkruara bruto të sigurimit për janar-mars 2025 kapën vlerën 5.5 miliardë lekëve, me rritje 7.09% kundrejt të njëjtës periudhë të një viti më parë. Gjatë tremujorit të parë, numri i kontratave të sigurimit të lidhura arriti në 347.838, me një rritje prej 11.90% krahasuar me të njëjtën periudhë të një viti më parë.
Gjatë kësaj periudhe dëmet e paguara bruto në tregun e sigurimeve arritën në rreth 1.9 miliardë lekë, ose 3.77% më pak se në tremujorin e parë të vitit të kaluar.
Dëmet e paguara bruto në sigurimin motorik (sigurimi i automjteve) për janar-mars 2025 kapën vlerën 1.2 miliardë lekë, duke pësuar një rritje me rreth 5.34% krahasuar me të njëjtën periudhë të një viti më parë.
Sigurimi i Detyrueshëm Motorik
Primet e sigurimit të detyrueshëm motorik, gjatë tremujorit të parë të këtij viti arritën rreth 3.3 miliardë lekë, me rritje 12.18% kundrejt të njëjtës periudhë të një viti më parë.
Produkti MTPL e brendshme shënoi në këtë periudhë një rritje prej 12.94 % të vëllimit të primeve të shkruara bruto. Kjo u shoqërua edhe me një rritje të numrit të kontratave prej 6.17% krahasuar me janar-mars 2024.
Produkti Karton Jeshil në janar-mars 2025 pati një rritje prej 9.23% të vëllimit të primeve të shkruara bruto. Kjo u shoqërua nga një rritje të numrit të kontratave prej 19.79% krahasuar me Janar-Mars 2024.
Produkti Sigurim Kufitar, në tremujorin e parë të këtj viti pati një rritje 0.51% të vëllimit të primeve të shkruara bruto krahasuar me të njëjtën periudhë të një viti më parë. Edhe numri i kontratave u ul me 1.10%.
Sigurimi Vullnetar
Primet e sigurimit vullnetar, gjatë tre muajve të parë arritën rreth 2.2 miliardë lekë, 0.14 % më shumë se janar-mars 2024. Numri i kontratave të sigurimit vullnetar u rrit me 15.70% krahasuar me një vit më parë.
Primet e sigurimit vullnetar të Jo-Jetës gjatë janar-marsit 2025, patën një ulje me 3.48% kundrejt tremujorit të parë të vitit të kaluar.
Në portofolat e Pronës, Përgjegjësive, Garancive të cilat gjatë janar-marsit 2025 siguruan mbi 860 milionë lekë të ardhura në total, vendin e parë e zunë Zjarri dhe Dëmtime të Tjera në Pronë me rreth 64.40%, të pasuara nga sigurimi i Përgjegjësisë së Përgjithshme me 22.64% të totalit.
Në portofolin sigurimi nga Zjarri dhe Forcat e Natyrës, gjatë janar-marsit 2025, vihet re një ulje prej 13.42% e vëllimit të primeve të shkruara bruto të këtij portofoli dhe një rritje me 8.08% e numrit të kontratave të sigurimit, krahasuar me janar-mars it 2024.
Të ardhurat nga sigurimet e Aksidenteve dhe Shëndetit, gjatë tremujorit të parë të këtij viti arritën në rreth 387 milionë lekë, duke shënuar një rritje prej 0.49% në krahasim me të njëjtën periudhë të vitit të kaluar.
Primet nga sigurimet e Jetës gjatë janar-marsit 2025, arritën rreth 531 milionë lekë, ose 13.67 % më shumë se një vit më parë.
Dëmet e Paguara Bruto
Pagesat e dëmeve gjatë tremujorit të parë të këtij viti u ulën me 3.77% krahasuar me të njëjtën periudhë të një viti më parë. Pjesa më e madhe e dëmeve të paguara bruto i përket sigurimit motorik me rreth 1.4 miliardë lekë apo 75.70% të totalit të dëmeve të paguara bruto.
