Tarifat e Trump dhe dëmi në industrinë fason

Nga Florian Zekja, përfaqësues i Pro Eksport Albania

Siç e dimë, pak ditë më parë presidenti Trump aplikoi taksa suplementare për importet nga vende të ndryshme të botës. Ndaj vendit tonë vendosi një taksë prej 10%, ndërsa kundrejt vendeve të  Bashkimit Evropian (BE) kjo taksë do jetë 20%.

Gjithashtu, duhet të kemi parasysh se sektori i prodhimit të veshjeve dhe këpucëve zë një vend të rëndësishëm në eksportet shqiptare deri në 39 % në vlerë mbi 1 miliard euro kryesisht drejt vendeve të BE ( Itali 60 %, Gjermani 30% dhe vendeve të tjera  të BE 10%).

Kjo manovër ekonomike mund të ketë një ndikim të konsiderueshëm në tregtinë midis BE-së dhe SHBA-së, përfshirë eksportet e tekstileve dhe këpucëve shqiptare. Kjo është për shkak se Shqipëria është një vend kandidat për BE-në dhe ka një marrëveshje tregtare me BE-në, duke përfituar nga statusi i tregut të lirë të BE-së. Megjithatë, Shqipëria do të ndikohet po ashtu nga tarifa të tilla për produktet që kalojnë përmes BE-së për të arritur në SHBA.

Për ta ilustruar me një situatë të vështirë të sektorit të modës për eksportet të vendeve të BE kundrejt USA në vitin 2002 mbas goditjes së Kullave Binjake të 11 shtatorit 2001, ranë me 15% dhe ky fenomen u pasua për disa vite me radhë.

Si përfundim, sipas kësaj analize, mendoj se sektori i veshjeve dhe këpucëve si pasojë e kësaj ” lufte taksash” ,do jetë më i godituri në muajt në vazhdim. Eksportet shqiptare direkte drejt USA janë rreth 100-120 milion dollarë.