Rritet kredia nga mikrofinanca, 400 milionë euro për individët dhe bizneset

Aurora Sulce, Producente Ekzekutive për Biznesin në A2 CNN

Institucionet financiare jo banka, ato që ndryshe njihen si mikrofinanca po japin gjithmonë e më shumë kredi, nisur nga kërkesa e lartë veçanërisht në disa sektorë që nuk mbulohen me kredi nga bankat, siç është bujqësia e blegtoria, apo edhe individët.

Të dhënat tregojnë se gjatë vitit 2024, nga mikrofinanca u dhanë rreth 400 milionë euro kredi, me rritje 12.2% kundrejt një viti më parë.

Por kush është financuar me këto para?

Më të kredituarit janë bizneset me 47% të totalit, pasuar nga individët me 36% të totalit të huasë të dhënë. Në vend të tretë është sektori i bujqësisë dhe blegtorisë me 15% të totalit.

Kërkesa për kredi nga institucionet financiare jo banka mbetet e konsiderueshme, pavarësisht normave të larta të interesit kundrejt sistemit bankar. Kjo për shkak të riskut më të lartë, lëvrimit më të shpejtë të huasë, por edhe faktit se nuk përdorin depozitat e klientëve, si në rastin e bankave por fondet e investitorëve.

Sektori, shumë herë i kritikuar pikërisht për shkak të kredive të shtrenjta, përballet sot me disa sfida.

Më kryesoret janë një ligj i ri për këtë sektor; digjitalizimi, si dhe çështjet e edukimit financiar, për tu kuptuar më shumë nga opinioni, por veçanërisht nga klientët.