“Ta bëjmë Amerikën sërish të pasur”, Trump dënon mbarë botën me tarifa

“Pavarësia ekonomike Amerikane” nisi me një firmë. Presidenti Donald Trump zyrtarizoi vendosjen e tarifave, të paktën 10 për qind, për mbarë botën, duke filluar zyrtarisht atë që po konsiderohet një luftë tregtare. Në podium mori me vete dhe një listë me vendet më të prekura, duke renditur në krye Kinën dhe më pas Bashkimin Europian.

“Miqtë e mi Amerikanë, kjo është Dita e Çlirimit. Kemi pritur për një kohë të gjatë. 2 Prilli i 2025-ës do të mbahet mend përgjithmonë si dita kur industria amerikane u rilind, dita kur fati i Amerikës u rikuperua dhe dita që filluam ta bëjmë Amerikën të pasur përsëri. Për dekada, vendi ynë është plaçkitur, përdhunuar dhe grabitur nga kombet e afërta dhe të largëta. Si punëtorët e çelikut, punëtorët e automobilave, fermerët dhe mjeshtrit e aftë, ata kanë vuajtur me të vërtetë në ankth teksa liderët e huaj na kanë vjedhur punët, mashtruesit e huaj kanë plaçkitur atë që dikur ka qenë ëndrra e bukur Amerikane”, tha Trump.

Ndaj Kinës tarifa është 34%, Bashkimi Europian preket me 20%, Britania me 10%, Koreja e Jugut me 25 dhe Japonia me 24, ndërsa ka vende të tjera si Kamboxhia, Madagaskari apo Mianmari që goditen me rreth 50% tarifë tregtare. Me këtë lëvizje, Trump synon që t’i detyrojë shtetet e prekura që të negociojnë marrëveshje të reja ekonomike.

“Ne po vendosim një dysheme prej 10%. E shikoni këtë listë? Kjo vazhdon edhe me shtete të tjera me tarifa që do të na ndihmojnë të rindërtojmë ekonominë tonë dhe në parandalimin e vjedhjes. Unë e konsideroj një masë disi reciproke, pasi nuk është plotësisht e tillë. Ne u kemi vendosur vetëm gjysmën e asaj që na merret ne. Nëse ata ankohen, dhe duan që tarifat të jetë zero, atëherë hajde dhe ndërto produktin tënd këtë në Amerikë, pasi nuk do keni tarifë. Thirrja ime është kjo: hiqni tarifat, ulni barrierat dhe mos manipuloni monedhën tuaj.”

Ndërkohë, Trump pati vendosur më herë tarifa në masën 25% për të gjitha importet e çelikut dhe aluminit. Gjithashtu caktoi dhe taksën 25% për importimin e automjeteve jo amerikane dhe për pjesët e makinave.