LIGJET E BIZNESIT
Një studim i fundit nga University of California, San Francisco, tregon se të rinjtë me ekspozim më të madh ndaj përdorimit të teknologjisë mund të jenë në rrezik më të lartë për të zhvilluar simptoma manike.
I publikuar në revistën Social Psychiatry and Psychiatric Epidemiology, studimi analizoi një kampion kombëtar prej 9,243 fëmijëve në SHBA të moshës 10 dhe 11 vjeç. Të rinjtë që kalonin më shumë kohë në social media, mesazhe, video dhe video games, kishin më shumë gjasa të shfaqnin sjellje të tilla si “vetëvlerësim i tepruar, nevojë e ulët për gjumë, shpërqendrim, të folur të shpejtë, mendime të vrullshme dhe impulsivitet” – sjellje që janë tipike për episodet manike, një tipar kyç i çrregullimeve bipolare, sipas njoftimit për shtyp.
“Ky studim nënvizon rëndësinë e krijimit të zakoneve të shëndetshme të përdorimit të ekraneve që në moshë të hershme,” tha bashkëautori Kyle Ganson, PhD, asistent profesor në Factor-Inwentash Faculty of Social Work në University of Toronto. “Sfidat kërkimore të ardhshme mund të na ndihmojnë të kuptojmë më mirë mekanizmat e trurit dhe sjelljet që lidhin përdorimin e ekraneve me simptomat manike, për të ndihmuar në parandalimin dhe ndërhyrjet e nevojshme.”
Këshilla për përdorim më të sigurt të teknologjisë
Me rastin e Global Day of Unplugging (7 Mars), Verizon organizoi samitin e saj të parë për mirëqenien dixhitale në New York City për të ndarë njohuri mbi përdorimin e sigurt të teknologjisë. Sowmyanarayan Sampath, CEO i Verizon Consumer Group, theksoi rëndësinë e vendosjes së kufijve dixhitalë, veçanërisht për fëmijët.
“Mirëqenia dixhitale duhet të vlejë për çdo moshë, por si prindër kemi nevojë për një plan të ri, pasi kurrë më parë nuk kemi kaluar diçka të tillë,” tha Sampath në eventin e organizuar në New York. “Kjo epokë dixhitale është e re për të gjithë. Nuk kemi asnjë periudhë të mëparshme në histori nga e cila mund të marrim mësime për këtë.”
Në një intervistë të veçantë për Fox News Digital, Sampath ndau statistika shqetësuese mbi përdorimin e telefonave nga fëmijët. Sipas raportit të Verizon Consumer Connections 2024, fëmijët dhe adoleshentët kalojnë mesatarisht 4 deri në 5 orë në ditë në social media dhe marrin nga 250 deri në 275 njoftime në ditë. Po ashtu, ata prekin dhe marrin telefonin në duar rreth 150 herë në ditë, ku një e katërta e këtyre rasteve ndodh gjatë orëve të shkollës. “Kjo na bëri të mendojmë se ekziston një mënyrë më e shëndetshme për të ndërtuar një marrëdhënie me teknologjinë,” tha Sampath.
Ndikimi i teknologjisë te fëmijët
Dr. Keneisha Sinclair-McBride, psikologe në Boston Children’s Hospital dhe asistente profesore në Harvard Medical School, gjithashtu foli në panelin e organizuar nga Verizon dhe në një intervistë për Fox News Digital. Ajo theksoi se fëmijët që kalojnë “orë të tëra” të kohës së lirë në telefon mund të përballen me rreziqe të mëdha, si bullizmi kibernetik dhe gjuha e urrejtjes.
“E dimë që këto lidhen me simptoma depresive dhe probleme të tjera të shëndetit mendor,” u shpreh ajo. Megjithatë, ajo theksoi se teknologjia ofron edhe përfitime, si mundësinë për të krijuar lidhje sociale, për të mësuar dhe për t’u argëtuar.
“Prandaj, duhet të gjejmë një ekuilibër mes këtyre dy gjërave.” Ajo vuri në dukje se disa aplikacione të social media janë të dizajnuara për t’i mbajtur përdoruesit “të bllokuar” në një cikël algoritmi. Kjo mund të çojë në një funksionim më të dobët në punë ose shkollë dhe të ndikojë negativisht në gjumin dhe marrëdhëniet sociale. “A mund të jetojnë fëmijët jetën e tyre dhe të bëjnë gjërat që duan dhe kanë nevojë të bëjnë në një mënyrë pozitive? Nëse ka shqetësime në këto fusha, kjo zakonisht është një shenjë që diçka duhet të rishikohet.”
Këshilla për prindërit dhe gjyshërit
Sinclair-McBride inkurajoi prindërit dhe gjyshërit të mësojnë për aplikacionet që përdorin fëmijët dhe t’i ndihmojnë ata të bëhen “konsumatorë kritikë” të përmbajtjes, duke i mësuar të dallojnë mashtrimet, dezinformimin ose përmbajtjen e krijuar nga inteligjenca artificiale.
“Ngadalësimi dhe të qenit më i vetëdijshëm për atë që po bëjmë është hapi i parë. Prindërit duhet të shohin edhe përdorimin e tyre personal të teknologjisë dhe të pyesin veten: ‘A e përdor telefonin tim shumë? A jam shumë i varur nga social media?’” Sampath gjithashtu u bëri thirrje të rriturve të vendosin kufizime për përdorimin e telefonave, duke i kufizuar në hapësira të caktuara të shtëpisë ose në kohë të caktuara të ditës.
Krijoni hapësirë për argëtim
Sampath ndau disa këshilla të thjeshta për të siguruar një ekuilibër të shëndetshëm midis teknologjisë dhe aktiviteteve në botën reale. “Shkoni në kinema. Bëni një shëtitje. Luani një lojë ose thjesht kaloni kohë me miqtë dhe familjen tuaj në kuzhinë duke bërë gjëra të këndshme,” sugjeroi ai.
“Mendoj se fëmijët duhet të ndihen rehat edhe duke mos bërë asgjë … duke lexuar një libër ose thjesht duke kaluar kohë të qetë.” Ai gjithashtu inkurajoi njerëzit të përfitojnë nga natyra dhe klima e mirë për të kaluar më shumë kohë jashtë. “Ju duhet të krijoni hapësirë për argëtim, për lojë dhe për aktivitet fizik, si dhe për marrëdhënie reale. Kjo ka përfitime afatgjata për shëndetin mendor …
Kur bëni gjëra në botën reale, ndiheni më të lumtur.” Sinclair-McBride mbështeti këtë këshillë, duke theksuar rëndësinë e daljes në natyrë dhe “prekjes së barit.” “Ka një mendim të gabuar se kjo gjeneratë dëshiron vetëm digital, por në fakt ata pëlqejnë edhe gjëra të tjera. Duhet t’u krijojmë hapësira dhe mundësi për këtë.”/ NYP
