LIGJET E BIZNESIT
Planifikimi financiar për pensionin është kthyer në një sfidë për shumicën e amerikanëve, por mësimet e fundit të publikuara nga Forbes ofrojnë këshilla të drejtpërdrejta për ata që duan të ndërtojnë një të ardhme më të sigurt ekonomikisht. Ekspertët financiarë theksojnë disa aspekte kyçe që shpesh anashkalohen në edukimin formal, por që janë vendimtare për stabilitetin personal dhe familjar.
- Si të siguroni të ardhura pa taksa gjatë pensionit
Ekzistojnë gjashtë strategji të planifikimit tatimor që ndihmojnë individët të përfitojnë të ardhura të lira nga tatimi pas tërheqjes nga puna. Këshillohet përdorimi i llogarive Roth IRA, menaxhimi i kohës së tërheqjes së fondeve nga llogaritë e kursimeve, si dhe përdorimi strategjik i përfitimeve nga sigurimet shëndetësore dhe sociale.
- Formula që të çon drejt lirisë financiare
Më shumë se gjysma e punonjësve amerikanë ndihen të vonuar në kursimet për pension. Bernadette Joy, autore e librit “Crush Your Money Goals”, shpjegon një formulë të thjeshtë që ndihmon çdo individ të llogarisë shumën që duhet të investojë për të arritur pavarësinë financiare. Ajo sugjeron që çdo plan i qëndrueshëm duhet të nisë me një objektiv konkret dhe I matshëm.
- Pensionistë me borxhe, çfarë duhet ditur?
Të kesh borxhe në pension nuk është më tabu. Bob Carlson, një tjetër kontributor i Forbes, analizon një ndryshim të qasjes tradicionale, mbajtja e një niveli të arsyeshëm borxhi mund të jetë strategji e vlefshme, për sa kohë menaxhohet me kujdes dhe pa rrezikuar likuiditetin personal.
- Kur pensioni i prindërve jeni ju
Shumë të rinj përballen me presionin financiar të mbështetjes së prindërve në pleqëri. Bernadette Joy ofron tri hapa për t’u përgatitur në mënyrë realiste dhe për të shmangur mbingarkesën financiare që mund të ndikojë në të ardhmen e tyre.
- Si mund të përdorni siguracionin e jetës për të rritur të ardhurat në pleqëri
David Rae këshillon që siguracioni i jetës mund të përdoret si pjesë mbështetëse e të ardhurave në pension, por jo si burimi i vetëm. Ai paralajmëron për skemat e dyshimta që u premtojnë përfitime të mëdha tatimore personave me të ardhura të ulëta.
- Dokumenti më i rëndësishëm përpara pensionit nuk lidhet me paratë
Sipas Bob Carlson, dokumentet mjekësore janë themelore në çdo plan pasuror. Ai thekson rëndësinë e përgatitjes së direktivave për kujdesin shëndetësor dhe autorizimeve ligjore, të cilat mund të jenë vendimtare në raste emergjente, pavarësisht moshës.
- Diversifikimi i portofolit është çelësi i sigurisë në pleqëri
Natalie Colley nënvizon se shumë pensionistë kufizojnë shpenzimet e tyre për të mos prekur investimet, duke jetuar nën mundësitë reale. Ajo sugjeron një qasje të balancuar, ku investimet janë të shpërndara në mënyrë të zgjuar, duke mundësuar të ardhura të qëndrueshme pa frikën e shterrimit të fondeve.
- Si të kurseni më shumë me një buxhet të thjeshtë dhe të zbatueshëm?
Eksperti True Tamplin paraqet disa hapa praktikë për ata që duan të ndërtojnë një buxhet efektiv. Ai thekson rëndësinë e ndjekjes së shpenzimeve, shmangies së blerjeve të panevojshme dhe vendosjes së objektivave të qarta për kursime dhe investime.
- Nëse je vonuar me investimet, ja si ta rregullosh situatën
Duke përdorur një metodë me pesë hapa të bazuar në akronimin “CRUSH”, Bernadette Joy ofron një mënyrë të strukturuar për të rishikuar strategjinë investuese dhe për të kapërcyer vonesat në ndërtimin e pasurisë.
- Tre gabimet më të zakonshme që u kushtojnë mijëra investitorëve
Gabimet më të zakonshme përfshijnë panikun gjatë luhatjeve të tregut, mungesën e diversifikimit dhe ndjekjen e këshillave jo të verifikuara. Joy thekson se shmangia e këtyre gabimeve është vendimtare për të mos humbur kapitalin në mënyrë të panevojshme.
- Pesë mësime financiare që nuk jepen në shkollë
True Tamplin rendit pesë koncepte themelore që çdo individ duhet të dijë, fuqia e interesit të përbërë, roli i buxhetimit, rreziku i borxhit të konsumit, rëndësia e sigurimeve dhe ndikimi afatgjatë i vendimeve të sotme financiare.
Në një epokë ku edukimi financiar është më i nevojshëm se kurrë, këto këshilla të ekspertëve ofrojnë një udhërrëfyes praktik për t’u përballur me të ardhmen me siguri dhe vetëbesim./ Forbes
