Uji i pijshëm mungon, premtimi për 24 orë në ditë shtyhet në mandatin e katërt

Nga Aurora Sulce, Producente Ekzekutive për Biznesin në A2 CNN

Uji i pijshëm është një ndër sektorët më jetikë të vendit, por edhe një ndër më problematikët. Borxhet e larta, si pasojë e keqmenaxhimit në vite, por edhe mungesa e investimeve kushtëzuan një situatë alarmante, ku pjesa dërrmuese e ujit në rrjet humbet. Thënë ndryshe, nuk paguhet. Në vitin 2022, qeveria ndërmori reformën e ujit, me synimin për ta vendosur këtë sektor në shina. Pas tre vitesh, ku jemi sot?

Sipas të dhënave zyrtare, niveli i arkëtimeve të faturave të ujit të pishëm ka arritur në 11.2 miliardë lekë, me rritje 1.2 miliardë kundrejt vititi 2022, kur nisi reforma. Kjo do të thotë një përmirësim i performancës me mesatarisht 400 milionë lekë në vit.

Ndërkohë që niveli i humbjeve, ai që njihet ndryshe si treguesi i ujit pa të ardhura, pavarësisht përmirësimit në tre vitet e fundit, mbetet problematik.

Sipas të dhënave, mbi 61.1% e ujit që hidhen në rrjet humbet, me një rënie të këtij treguesi me 3.1% në harkun kohor të tre viteve.

Por një ndër elementët ku duket se reforma ka dhënë efekt më të dukshëm është tek shlyerja e faturave të energjisë elektrike, ku historikisht shoqëritë e ujësjellës kanalizimeve kanë qenë debitorët kryesorë të Operatorit të Shpërndarjes së Energjisë.

Rezulton se në fund të vitit 2024, ujësjellësat kanë shlyer 99% të faturave të energjisë që kanë konsumuar nga 65% që paguanin në vitin 2022, kur nisi reforma.

Ndërkohë furnizimi me ujë të pijshëm mbetet ende problem për një pjesë të vendit dhe jemi ende larg furnizimit me 24 orë ujë të pijshëm në cezmat tona. Një premtim që qeveria e ka rikthyer për mandatin e katërt.