Deklarimi i të ardhurave, afati deri më 31 mars. Kush duhet të plotësojë DIVA?

Nga Aurora Sulçe, Producente Ekzekutive për Biznesin në A2 CNN

Qytetarët kanë afat diri në fund të këtij muaji për të bërë deklarimin e të ardhurave. Një proces që këtë vit ka pasur disa ndryshime, të njoftuara më herët edhe nga administrata tatimore. Kështu, afati për dorëzimin e deklaratës së të ardhrave, ose ndryshe DIVA do të jetë 31 marsi dhe jo më 30 prilli. Ndërkohë që detyrimin e deklarimit do ta kenë të gjithë ata individë që realizojnë mbi 1.2 milionë lekë të ardhura në vit nga mbi 2 milionë që ishte më përpara.

E thënë më thjesht, kush duhet të deklarojë?

Të gjithë ata që marrin mbi 100 mijë lekë në muaj pagë bruto duhet të plotësojnë formularin e deklarimit të të ardhurave. Deklarimi duhet të bëhet edhe nga të gjithë të dypunësuarit, pavarësisht nivelit të pagave. Këto ndryshime bëhen në kuadër të formalizimit të tregut të pagave dhe rritjes së kontrollit mbi qarkullimin e parasë.

Por sa është numri i atyre që kanë deklaruar deri më tani të ardhurat?

Sipas të dhënave, rezultojnë mbi 73 mijë individë që plotësojnë formularin e deklarimit vjetor të të ardhurave, nga të cilët mbi 24 mijë janë inidvidë dhe mbi 49 mijë janë të dypunësuar.