Kredi të buta për strehim, nga mësuesit e policët deri te infermierët. Përfitojnë 530 punonjës shteti

Nga mësuesit e policët, te mjekët apo infermierët, te ushtarakët, diplomatët… bashkë me ata që punojnë në Ministrinë e Bujqësisë, atë të Drejtësisë dhe Ekonomisë, Kulturës dhe Inovacionit do të mund të marrin kredi pa interesa për të blerë shtëpi.

Janë 530 punonjës të administratës publike, përfshirë rrogëtarët në Ministrinë e Financave, Infrastrukturës dhe Energjisë, Turizmit dhe Mjedisit dhe Kryeministri që mund të aplikojnë për të përfituar nga programi i qeverisë.

Teuta Nunaj, eksperte për ekonominë, shprehet: “Nëse do ta analizojmë në aspektin makro, duhet të themi se këto para gjithsesi shtyjnë ekonominë e vendit, pasi fundja këtu shpenzohen. Nëse duhet ta shohim në mikro, pra në aspektin familjar, kjo është një politikë mbështetëse sociale, pasi kredia merret me kosto shumë të lehtësuara”.

Marrja e një kredie të butë bëhet veçanërisht e leverdisshme në ditët e sotme, pavarësisht zbutjes së lehtë të normave të interesit. Por, a mund të shtrihet kjo politikë edhe përtej punonjësve të administratës?

“Do të ishte shumë e vështirë që të shtrihej edhe në të tjera kategori. Kjo pasi në një farë mënyre qeveria do të merrte atributet e bankave, duke dëmtuar këto të fundit”, shpjegon Nunaj.

Për të përfituar nga politika e strehimit social, ata që punojnë në shtet duhet të kenë një kontratë afatgjatë. Gjithashtu, ata duhet të mos kenë banesë në emër të tyre apo familjarëve dhe të kenë të ardhura të mjaftueshme për të shlyer kredinë, por më pak se 135 mijë lekë në muaj.