LIGJET E BIZNESIT
Interes i lartë nga kompani ndërkombëtare për të investuar në industrinë e mbrojtjes së Shqipërisë. Lajmin e ka bërë të ditur ministri i Mbrojtjes, Pirro Vengu.
“Për industrinë ushtarake janë vendosur të gjitha themelet rregullatore nga kompania shtetërore, e cila tashmë ka rigrupuar 5 asete. Kemi marrë 21 shprehje interesi zyrtare nga kompani ndërkombëtare për prodhim municionesh, artilerie, dronësh ushtarakë dhe jemi duke zhvilluar negociata me 5 prej tyre. Besoj se shumë shpejt do të jemi në gjendje që edhe pas Komisionit të Sigurisë të japim një pasqyrë të qartë të gjendjes së negociatave”, deklaroi Vengu në Kuvend.
Ministri bëri të ditur gjithashtu, se shumë shpejt do të shkojnë në parlament aktet ligjore për shërbimin e detyrueshëm ushtarak, shërbimin reservist dhe rritjen e pagave.
“Do vazhdojmë të investojmë në kapital njerëzor. Kemi pasur rrogat më të ulëta në rajon dhe synimi ynë është të arrijmë mbi mesataren e NATO-s. Do vijmë shumë shpejt me aktet ligjore dhe nënligjore për këtë”, u shpreh ministri Vengu.
