Aksidenti ku humbën jetën 4 të rinjtë, reagon Shoqata e Ndërtuesve: Një tragjedi që duhet të na zgjojë të gjithëve

Shoqata e Ndërtuesve ka reaguar ndaj ngjarjes së rëndë, ku humbën jetën në mënyrë tragjike katër të rinj në aksidentin e fundit. Sipas ndërtuesve, kjo është një dhimbje e madhe për familjet e tyre dhe për të gjithë shoqërinë. Shoqata e Ndërtuesve shpreh ngushëllimet më të sinqerta për familjarët dhe të afërmit e viktimave. Kjo ngjarje e rëndë na kujton se shkeljet e rregullave dhe neglizhenca në siguri nuk janë thjesht shifra në statistika – ato kanë pasoja të rënda dhe të parikuperueshme.

“Nuk mund të qëndrojmë indiferentë përballë abuzimeve dhe informalitetit që vijojnë të minojnë ndërtimtarinë dhe të rrezikojnë jetën e njerëzve. Punësimi i paligjshëm, mungesa e kualifikimeve të nevojshme, neglizhenca në logjistikë dhe shkeljet e rregullave të sigurisë duhet të marrin fund. Ky aksident nuk është rastësi, por një pasojë e drejtpërdrejtë e papërgjegjshmërisë dhe mungesës së kontrollit të duhur”, theksohet në njoftimin për shtyp të shoqatës.

Shoqata e Ndërtuesve e dënon me forcë këto praktika dhe kërkon nga institucionet përgjegjëse që të rrisin monitorimin dhe të ndëshkojnë çdo subjekt që nuk respekton standardet e sigurisë dhe punësimit. Nuk mund të lejojmë që pakujdesia dhe abuzimi të cënojnë jetën dhe reputacionin e një sektori të tërë.

“Siguria dhe ligjshmëria nuk janë opsione – janë detyrim i patjetërsueshëm! Ky është momenti për të vepruar dhe për të ndaluar njëherë e mirë shkeljet që kushtojnë jetë njerëzish”, përfundon njoftimi.