LIGJET E BIZNESIT
Udhëtimet solo për femra nuk janë më thjesht një trend kalimtar gjithnjë e më shumë gra po zgjedhin të nisin aventurat e tyre të vetme, dhe ky fenomen duket se vetëm sa po rritet. Për shumë, ëndrra është të eksplorojnë destinacione të largëta në anën tjetër të globit, por për ato që sapo kanë nisur këtë rrugëtim, është e kuptueshme të preferojnë diçka më afër shtëpisë.
Për këtë arsye kemi përzgjedhur disa nga destinacionet më të sigurta dhe më frymëzuese në Europë, ideale për udhëtaret solo. Qoftë për sigurinë që ofrojnë, transportin e shkëlqyer publik apo kulturën e pasur, këto vende janë perfekte për të shijuar një udhëtim të paharrueshëm.
1. Islandë
Islanda është një ndër vendet më të sigurta në botë – një zgjedhje e shkëlqyer për udhëtimin tënd solo. Kryeqyteti Reykjavik ofron shumë për të parë, por bukuritë natyrore si Plazhi me Rërë të Zezë apo Parku Kombëtar Thingvellir janë ato që e bëjnë vendin magjepsës. Mos harro të relaksohesh në pishinat termale si Blue Lagoon apo Sky Lagoon për një përvojë vërtet qetësuese.
2. Andaluzia, Spanjë
Për ata që duan një udhëtim të qetë dhe kulturor, jugu i Spanjës është ideal. Sevilja të pret me tapa të shijshme dhe shfaqje flamenkoje, ndërsa Kordoba të magjeps me Mezquitën historike. Malaga ofron muze të klasit botëror dhe plazhe të relaksuara, ndërsa Nerja, një nga qytetet më të bukura bregdetare, është perfekte për një pushim në stil surferi.
3. Lisbonë, Portugali
Lisbona është një qytet ku mund të ecësh pafund, duke vëzhguar ndërtesat me pllaka azulejos, duke eksploruar tregjet antike apo duke vizituar muzetë. Natën, lagjja Bairro Alto ofron atmosferë festive me bare boheme dhe njerëz miqësorë, duke e bërë më të lehtë ndjesinë e përfshirjes edhe kur je vetëm.
4. Vjenë, Austri
Kultura e kafeneve në Vjenë është perfekte për udhëtimet solo – vendi ideal për të pushuar, për të lexuar apo për të vëzhguar njerëzit. Nga ana tjetër, është një bazë e mirë për ekskursione njëditore në Alpet austriake ose në qytete si Bratislava dhe Budapest.
5. Split, Kroaci
Kroacia është një destinacion gjithnjë e më popullor, por ende ekonomik. Split ofron një atmosferë të gjallë për ata që duan të socializohen, është i përshtatshëm për të eksploruar ishujt përreth, dhe shumë pranë ndodhet Parku Kombëtar Krka me ujëvarat magjepsëse – një vend që duket si sfond kompjuteri.
6. Kopenhagë, Danimarkë
Kopenhaga është një nga qytetet më të lehta për t’u eksploruar vetëm – falë rrugëve të bukura dhe transportit publik efikas. Vizito galeritë si Glyptotek apo Statens Museum for Kunst, eksploro pallatet dhe shijo pastiçeritë vendase për të mbushur energjitë ndërsa ecën.
7. Porto, Portugali
Edhe pse i kodërt, Porto ofron pamje spektakolare, sidomos nga Miradouro da Serra do Pilar. Është një vend i mirë për të takuar vendas apo udhëtarë të tjerë. Shko drejt fushave të verës në luginën e Douro-s për një përvojë autentike me pamje dhe verë të mrekullueshme.
8. Edinburg, Mbretëria e Bashkuar
Qyteti skocez është mikpritës dhe kulturor, ideal për udhëtimin tënd të parë solo. Nga libraritë te pub-et tradicionale, nga natyra e mrekullueshme te festivalet si Edinburgh Fringe – gjithmonë ka diçka për të parë dhe përjetuar, pa ndjerë nevojën e një shoqëruesi.
9. Parisi, Francë
Qyteti më romantik në botë është një vend ideal për të ‘romantizuar jetën tënde’ – edhe kur je vetëm. Vizito tregjet e vintage në Le Marais, libraritë në Belleville, apo ekspozitat e Musée d’Art Moderne. Për kulinarinë, provo L’Avant Comptoir de la Terre apo Poni për ushqim, dhe Bar à Bulles për kokteje.
Gati për udhëtimin tënd solo?
Udhëtimet vetëm janë një mënyrë për të njohur botën, por edhe veten. Nëse po mendon të bësh hapin këtë vit, këto destinacione europiane të ofrojnë siguri, kulturë, natyrë dhe përvoja të paharrueshme./ timeout
