Zvicra “ngrin” fondet me Shqipërinë? Ambasada shpjegon se kush preket

Qeveria e Zvicrës, ka vendosur të marrë një vendim për reduktimin e fondeve për programet e ndihmave për zhvillim, në vendin tonë. Përmes një njoftimi, Ambasada e Zvicrës në Shqipëri, ka deklaruar se programi i bashkëpunimit të Zvicrës me Shqipërinë do të vazhdojë me fokus zhvillimin ekonomik, shërbimet e infrastrukturës dhe ndryshimet klimatike, duke ngadalësuar gradualisht aktivitetet në fusha të tjera.

Ky veprim vjen si rezultat i vendimeve buxhetore të marra nga Parlamenti zviceran në dhjetorin e vitit të kaluar. Ndërsa këto vendime të zyrtarizuara nga Këshilli Federal i Zvicrës, më 29 janar 2025, kërkojnë përshtatjen e angazhimit të Zvicrës në vende të ndryshme, përfshirë Shqipërinë.

Por cilat janë reduktimet?

Sipas njoftimit të ambasadës zvicerane në Shqipëri, reduktimi gradual ka të bëjë me financimet e Agjencisë Zvicerane për Zhvillim dhe Bashkëpunim (SDC) por kjo nuk ndikon mbështetjen e ofruar për Shqipërinë nëpërmjet Sekretariatit të Shtetit për Çështjet Ekonomike (SECO).

Në njoftim theksohet se Zvicra mbetet e përkushtuar të mbështesë Shqipëirnë në rrugën e saj të zhvillimit deri dhe pas vitit 2028, veçanërisht përmes instrumenteve të bashkëpunimit për zhvillimin ekonomik të financuara nga SECO, duke promovuar një rritje ekonomike miqësore ndaj mjedisit dhe klimës, dhe sociale. Mbështetja e SECO-s mbulon fusha të tilla si forcimi i institucioneve financiare, stabiliteti makroekonomik, rritja e sektorit privat, një mjedis të favorshëm biznesi dhe tranzicionin e gjelbër.