LIGJET E BIZNESIT
Nga Aurora Sulçe, Producente Ekzekutive për Biznesin në A2 CNN
Teksa tregu i punës në shqipëri po vuan mungesën e fuqisë punëtore, një pjesë e madhe e atyre që sot janë në punë nuk kanë siguri. Raportet e institucioneve ndërkombëtare vlerësojnë se punësimi vulnerabnël ose thënë ndryshe i pasigurtë mbetet problem për Shqipërinë.
Janë rreth 47% e të punësuarve në vendin tonë që konsiderohen të punësuar vulnerabël. Thënë ndryshe, kanë paga të ulëta e kushte të papërshtatshme pune. Një shifër që mbetet e lartë pavarësisht një zbutje të lehtë vitet e fundit.
Por cilët konsiderohen të punësuar vulnerabel?
Bëhet fjalë për ata që punojnë pa pagesë në biznesin e familjes ose që janë të vetëpunësuar, që paga e tyre nuk varet në mënyrë të drejtëpërdrejtë nga të ardhurat e realizuara.
Por pse Shqipëria ka një nivel kaq të lartë të punësimit vulnerabël?
Arsyeja e parë është metodologjia e përllogaritjes së të punësuarve në bujqësi. Në Shqipëri konsiderohesh i punësuar në këtë sektor nëse ke një ngastër toke, pavarësisht nëse nxjerr apo jo të ardhura prej saj apo e ke për vetëkonsum, Arsyeja e dytë është niveli i lartë i informlitetit në tregun e punës, që sipas përllogaritjeve, vlerësohet në mbi 50%.
Por cilat janë pasojat e një situate të tillë në tregun e punës?
Punësimi i pasogurtë është efekti i parë, që përkthehet më pas në të ardhura të ulëtra për këta të punësuar dhe në përjashtim të tyre nga sistemi i sigurimeve.
