LIGJET E BIZNESIT
Kryeministri Rama po përiqet të “rilindë” bujqësinë me kredi. Kryeministri zhvilloi një takim me guvernatorin e Bankës së Shqipërisë dhe përfaqësues nga sistemi bankar për të diskutuar mbi mënyrat e financimit të sektorit, që është më pak i kredituari nga bankat.
Në takim është vendosur që të vihet në dispozicion të bujqësisë një linjë e re financimi ndërmjet Bankës së Shqipërisë dhe garancisë sovrane që do të japë qeveria. Kryeministri Edi Rama u shpreh se interesi i ulët i kredive dhe reduktimi i kërkesave për kolateral do ta bëjnë këtë financim më tërheqës për fermerët dhe sipërmarrësit ruralë.
“Duhet të jemi shumë të hapur dhe besoj duhet të biem dakord që 2.1% e volumit të përgjithshëm të kredive për këtë sektor, është vërtet shumë pak. Me mirëkuptimin e plotë për ngurrimin, me bindjen që me ndërveprim dhe mbështetje mes bankës qendrore dhe nivelit të dytë shumë arsye të ngurrimit do kapërcehen. Ky është një hop cilësor, shumë premtues për sektorin dhe vendin. Duke pasur parasysh, kemi vendosur objektivin që në 2030 eksportet të arrijnë mbi 1 mld euro. I kemi 4-fishuar. Arritja e objektivit për 1 mld euro kërkon një fuqi të shtuar të fermerëve dhe do vijë përmes investimeve dhe rritjes së volumit të sipërmarrjes në fshat”, tha Rama.
Një kreditim të tillë të bujqësisë guvernatori i Bankës së Shqipërisë e cilësoi një hap të madh që do ndikoj në uljen e varfërisë.
“Ecuria ende larg nevojave që sektori bujqësor ka për kredi pasqyron realitetin e rrezikut që mbart kreditimi i tij si pasojë e natyrë së aktiviteti, mungesës së kolateralit dhe kostove të larta. Por rritja e vëmendjes suaj ndaj kreditimit të tij është një çështje me rëndësi strategjike për zhvillimin e vendit. Studimet e kryera kanë evidentuar se kreditimi i këtij sektori ka një ndikim dy herë më të madh në reduktimin e varfërisë krahasuar me kreditimin e sektorëve të tjerë”, u shpreh Sejko.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Deri në 2027 qeveria të dedikojë nga buxheti I shtetit 5.1 miliardë lekë. “Në sektorin e bujqësisë këtë vit duke arritur në 146 milionë euro, ku vetëm për skemën kombëtare të fermerëve dhe subvencionimit të naftës kemi alokuar 4,4 miliardë lekë për të çuar atë deri në 5,1 miliardë lekë deri në 2027”, tha Petrit Malaj, ministër i Financave.
“Zhvillimi natyral ekonomik, i vënë nën presion aktualisht si nga kërkesa në rritje për eksporte, por edhe nga konsumi i brendshëm në rritje, si rezultat i rritjes së numrit të turistëve që vizitojnë çdo vit Shqipërinë, ka nevojë për mbështetje reale të zhvillimit dhe krijimin e kushteve të favorshme për të nxitur investimet cilësore”, tha Anila Denaj, ministre e Bujqësisë.
Bujqësia zë një vend të rëndësishëm në ekonominë e vendit teksa edhe 40% e popullsisë është e punësuar në këtë sektor.
