Pensionet e ulëta, Rama premton reformim të skemës

“Të zgjedhësh mes dhimbjes afatshkurtër dhe dhimbjes afatgjatë sepse reformë pa dhimbje nuk ka”, kështu u shpreh kryeministri Rama.

Qeveria ka zgjedhur të parën! Skema e pensioneve e vitit 2014 nuk do të zhbëhet, por ajo do të pësojë ndryshime rrënjësore. Paralelisht me reformën, shteti do të vijojë të japë nga dy bonuese për të moshuarit çdo vit.

“Reformimi i skemës së pensioneve është maratonë, nuk është sprint. Të gjitha sprintet na kanë çuar në situatën e viit 2014”, tha Rama.

Nga konferenca ndërkombëtare për reformën në sistemin e pensioneve, kryeministri Edi Rama nuk i kurseu ironitë mbi premtimet e opozitës për të moshuarit.

“Ata që nuk kanë asgjë në dorë, premtojnë gjithçka të dëshirueshme dhe të imagjinueshme. Të premtosh gjithçka të dëshirueshme dhe të imagjinueshme, do të thotë ti hapësh luftë fakteve, ti kthesh kurrizin ekspertëve, ekspertizës dhe të hidhesh sy mbyllur drejt një humnere”, tha Rama.

Teksa nxori në pah tre shkaqet kryesore që rrezikojnë deri në pamundësi skemën aktuale të pensioneve Drejtoresha e Bankës Botërore për Ballkanin Perëndimor, Xiaoqing Yu tregoi edhe se si duhen korrigjuar në të ardhmen gabimet e së shkuarës.

“Emigrimi, Informaliteti shumë i lartë dhe nën deklarimi i pagave po dëmton pensionet. Pensionet private duhet të kenë patjetër një rol plotësues, të jenë shtesë. Ndryshimet në skemën e pensioneve do të kenë sukses vetëm nëse publiku e kupton nevojën për reformën e pensioneve. Informimi i publikut është më rendësi publike për pasjen e suksesit, keni mbështetjen tonë tek për reformën e sistemit të pensioneve”, u shpreh Xiaoqing Yu, Drejtoresha e Bankës Botërore për BP.

Nëse këto gabime nuk korrigjohen, të moshuarit në vend nuk do mund të pleqërojnë kurrë me dinjitet. Paratë që ata marrin nuk mjaftojnë dhe kjo u pranua edhe nga Ministri i Ekonomisë, Kulturës dhe Inovacionit, Blendi Gonxhja.

“Përpjekja e deritanishme për ta adresuar mos-mjaftueshmërinë e të ardhurave për pensionistët me bonuse e transferta të tjera, ku vitin që shkoi akorduam edhe bonusin më të lartë të dhënë ndonjëherë dhe sivjet siguruam edhe bonusin e ri të pranverës, duhet të  një zgjidhje afat-gjatë dhe në afat-gjatë nuk është as e qëndrueshme”, tha Blendi Gonxhja, ministër i MEKI.

Me ndihmën e Bankës Botërore dhe Fondit Monetar Ndërkombëtar, Shqipëria ka hartuar një draft-dokument për të ndryshuar skemën e pensioneve që pritet të hidhet së shpejti për konsultim publik.