Ngadalësohet rritja e çmimeve, por ushqimet ende të shtrenjta

Inflacioni, treguesi që mat koston e jetesës ka pësuar rënie në janar. Sipas të dhënave të Institutit të Statistikave, muajin e kaluar inflacioni zbriti në 1.9% nga 3.4% që ka qenë në të njëjtën periudhë të një viti më parë.

Por pavarësisht kësaj ecuri, cmimet e produkteve ushqimore mbeten të larta. INSTAT raporton se inflacioni i grupit “Ushqime dhe pije joalkoolike” shënoi në janar 2.6%, duke qenë 0.7% më i lartë se inflacioni i përgjithshëm.

Ndryshimet vjetore të grupeve kryesore

Krahasuar me muajin Janar 2024, rritja më e madhe e çmimeve vërehet në grupin “Argëtim dhe kulturë” me 5,7 %, pasuar nga grupet “Pije alkoolike dhe duhan” dhe “Mobilje, pajisje shtëpie dhe mirëmbajtje e shtëpisë” me 3,9 % secili, “Veshje dhe këpucë” me 3,3 %, “Ushqime dhe pije joalkoolike” me 2,6 %, “Hotele, kafene dhe restorante” me 1,7 %, “Mallra dhe shërbime të ndryshme” me 1,6 %, “Komunikimi” me 1,2 %, “Qira, ujë, lëndë djegëse dhe energji”, “Shëndeti” dhe “Shërbimi arsimor” me 0,9 % secili. Nga ana tjetër çmimet e grupit “Transporti” shënuan ulje me 2,5 %. Brenda grupit të ushqimeve çmimet e nëngrupit “mish” patën një rritje me 4,0 %, pasuar nga nëngrupet “qumësht, djathë dhe vezë” me 3,3 %, “zarzavate përfshirë patatet” me 3,0 %, “peshk” me 2,0 %, “sheqer, reçel, mjaltë, çokollata dhe ëmbëlsira” me 1,4 %, etj.