LIGJET E BIZNESIT
Teksa skema e subvencionimit të paneleve diellore për ngrohjen e ujit do të aplikohet edhe këtë viti, një pjesë e kostove do të duhet të përballohen nga konsumatorët familjarë, në formën e bashkëfinancimit.
Kjo, duke mbajtur në konsideratë se subvencionimi përfshin 70% të vlerës, ndërsa pjesa tjetër prej 30% do të duhet të paguhet nga abonentët, në momentin që do të marrin konfirmimin nga Agjencia e Eficiencës së Energjisë pas dorëzimit të dokumenteve të aplikimit.
Aktualisht, Agjencia ka hapur thirrjen për kompanitë që janë të interesuara të ofrojnë shërbimin për shitjen dhe instalimin e paneleve diellore për ngrohjen e ujit.
Ndërkohë që, do të jenë çmimet që do ofrohen prej tyre që do pëcaktojnë koston e saktë. Megjithatë, referuar listës së subjekteve të kualifikuara në programin e parë të vitit 2023, mesatarisht një panel shkon 130 000 lekë, nga të cilat 70% apo 91 mijë lekë do të mbulohen nga shteti.
Ndërkohë që, pjesa tjetër, prej 39 mijë lekë janë kosto që do të duhet të paguhen nga familjet e interesuara për të përfituar.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Skema për nxitjen e përdorimit të paneleve diellore për ngrohjen e ujit nga klientët familjarë synon reduktimin e konsumit të energjisë elektrike dhe përmirësimin e furnizmit me ujë të ngrohtë sanitar, si dhe reduktimin e emetimeve të CO2.
Sipas një studimi të realiziuar nga Enti Rregullator i Energjisë kostoja për ngrohjen e ujit zë 19% të faturës së energjisë elektrike. Aplikimet për konsumatorët familjarë të interesuar do të hapen në datën 24 shkurt 2025./Tv Scan
