LIGJET E BIZNESIT
Bujqësia do të vijojë me të njëjtën skemë rimbursimi TVSH-je, deri në shtator 2025, kur të konstituohet Parlamenti i ri i dalë nga zgjedhjet e 11 majit. Komisioni Qendror i Zgjedhjeve bllokoi shqyrtimin dhe miratimin e projektligjit për Tatimin mbi Vlerën e Shtuar, që rregullon skemën e rimbursimit në bujqësi, me argumentin se ka efekt elektoral dhe shkel Kodin Zgjedhor.
“Kam kërkuar shpjegime nga KQZ, dhe pres një informacion, po jam i bindur se ata nuk e kanë kuptuar nismën”, tha Eduart Shalsi, kreu i Komisionit të Ekonomisë.
Nisma e propozuar nga deputeti Erion Braçe kërkon barazimin e TVSH-së 20 % në bujqësi, pasi sot një grumbullues kur blen produktin tek fermeri, rimbursimin e TVSH-së e ka 0 %, ndërsa kur e blen në import rimbursohen 20 %. Me argumentin se ky projektligj nuk sjell favore tatimore, Komisioni i Ekonomisë kërkon sqarime nga KQZ se ku preket kodi. Nismëtari Erion Braçe kërkoi që nisma të miratohet nga Kuvendi dhe se gjobën e KQZ-së do e paguaj vetë ai.
“Më vjen keq që nisma ka një emër mbiemër dhe minimalisht duhet të më kishte thirrur, për të kuptuar ata se për çfarë bëhet fjale. Te marrin e të lexojnë nismën, dhe të kuptojnë se çfarë efekti ka nisma. Vendimi që kanë marrë është vendim kuzhinë, të ndalosh cilindo të qëroje patatet në kuzhinë se përfituesi është ai që han patate të skuqura. Do doja shumë të vijonim përpara dhe gjobën e paguaj unë me këste. Kush është ankuar për këtë nismë, kush? 6 vite e kam kuptuar se kush e pengon nismën, por ata kanë arritur deri këtu tek KQZ”, tha deputeti Braçe.
Ndryshimi i skemës është miratuar unanimisht të martën nga Komisioni i Ekonomisë, bazuar në argumentin se formula e 2018-ës e propozuar nga ish-ministri në arrati Arben Ahmetaj, ka dëmtuar sektorin, ka favorizuar produktet e importit të të gjitha grupeve ushqimore dhe ka shtuar informalitetin.
Barazimi i skemës së TVSH-së është një kërkesë që përsëritet çdo vit që prej 2018-ës, sa herë që shqyrtohet buxheti dhe paketa fiskale. Po të martën, KQZ bllokoi edhe nismën për “Paketën e Maleve”, e cila në fakt më herët ishte pezulluar nga vetë deputetët në komisione parlamentare, pasi favorizon me përjashtime tatimore 500 përfitues.
