Kohë borxhesh, shtohen detyrimet për qeverinë, qytetarët dhe bizneset

Nga Aurora Sulce, Producente Ekzekutive për Biznesin në A2 CNN

Ky fillim viti ka përkuar me shtim të borxheve për të gjithë: qeverinë, qytetarët dhe bizneset. Ekzekutivi doli në tregun ndërkombëtar për të marrë një borxh të ri.

Bëhet fjalë për eurobondin me vlerë 650 milionë euro, që është marrë për një afat 10 vjecar dhe yild 5%.

Më shumë borxhe kanë marrë edhe qytetarët dhe bizneset. Kjo nëse iu referohemi të dhënave për kredinë e marrë në rrugë zyrtare në sistemin bankar, pasi të dhëna për borxhet informale tek të afërmit, miqtë apo edhe në tregun e fajdeve nuk ka.

Totali i huasë që individët kanë marrë pranë bankave arriti në fund të vitit të kaluar në mbi 309 miliardë lekë, me rritje 37.9 miliardë kundrejt vitit 2023. Qytetarët kanë më shumë borxhe tek bankat për të blerë shtëpi dhe për konsum.

Përsa i përket bizneseve, edhe detyrimet e tyre janë rritur.

Kreditë që bizneset kanë marrë pranë bankave kanë arritur në vitin 2024 në mbi 438 miliardë lekë, me rritje 50.1 miliardë kundrejt vitit 2023. Më shumë të financuar rezultojnë sektorët e tregtisë, ndërtimit dhe energjisë elektrike.