Kina kërkon ujë në Hënë, dërgon robotin fluturues

Kina planifikon të dërgojë një robot fluturues në anën e largët të Hënës vitin e ardhshëm për të kërkuar ujë të ngrirë, një element kyç për eksplorimin e ardhshëm hënor, ndërsa vendi vazhdon me programin e tij ambicioz hapësinor. Roboti “detektori fluturues” do të vendoset në polin jugor hënor si pjesë e misionit Chang’e-7, i cili synon ta afrojë Kinën më pranë dërgimit të astronautëve në Hënë brenda pesë viteve, raportoi media shtetërore të hënën.

Kina ka bërë përpjekje të konsiderueshme për t’u vendosur si një lojtar kryesor në hapësirë – një fushë në të cilën vende si Shtetet e Bashkuara po shikojnë jo vetëm për përfitime shkencore, por edhe për burime dhe siguri kombëtare.

Gjetja e ujit në Hënë nuk është një risi. Vitin e kaluar, shkencëtarët kinezë zbuluan ujë në mostrat e dheut nga sonda Chang’e-5, ndërsa NASA dhe anije hapësinore indiane kanë vëzhguar më parë shenja të mundshme të ujit në sipërfaqen hënore.

Disa shkencëtarë besojnë se vetëm akulli, i ruajtur thellë në kratere në anën e largët të Hënës, mund të jetë një burim i qëndrueshëm uji për misionet e ardhshme.

Kërkimi për akullin hënor është pjesë e përgatitjeve të Kinës për ndërtimin e një baze kërkimore në polin jugor të Hënës, thanë ekspertët hapësinorë kinezë për televizionin shtetëror CCTV. “Ka disa shpella shumë të thella në polin jugor të Hënës dhe ne mendojmë se mund të ketë ujë atje”, tha Wu Weiren, kryeprojektuesi i Programit të Eksplorimit Hënor të Kinës. “Shpresojmë që detektori fluturues të kryejë inspektime në një ose dy shpella pas uljes”.

Gjetja e depozitave të akullit mund të ndihmojë një ditë në mbështetjen e jetës njerëzore në Hënë, duke ulur ndjeshëm koston e misioneve hapësinore dhe duke sugjeruar mundësinë e jetës jashtëtokësore.

Ekspertët kanë thënë se megjithëse zbulimi i ujit hënor hap mundësi për eksplorime të mëtejshme, ne ende nuk mund ta përdorim atë për të kultivuar të korra apo për të nxjerrë ujë të pijshëm, pasi këto varen nga faktorë si sasia dhe forma kimike e ujit.

Kina synon të bëhet vendi i dytë që zbarkon astronautë në Hënë, duke thënë se misioni i saj i parë me ekuipazh do të zhvillohet “deri në vitin 2030”.