Keni të punësuar dado apo ndihmëse për pastrim? Procedura si t’i deklaroni

Puna me orare të gjata, nevoja e punësimit për të dy prindërit si dhe angazhimet pas orarit të punës, bëjnë që çdo ditë e më shumë familjet shqiptare të kenë nevojë për ndihmë.

Këtë nevojë, një pjesë e madhe, zgjidhin duke punësuar ndihmës për punët e shtëpisë, kujdesin për të moshuarit apo kujdesin për fëmijët e vegjël.

Por ndërsa ky është nje treg punësimi më vete, shumica prej të punësuarve janë informale, duke humbur të drejtën për sigurime.  Kjo edhe për shkak te mungesës së njohurive që kanë këto familje për ti deklaruar.

Por si veprohet në këto raste?

Nese personi që ka punësuar një ndihmëse dhe nuk ka një NIPT personi fizik,  ai mund të deklarojë në formë tjetër.

Konkretisht, kryefamiljari hap një user në tatime si Kryefamiljar. Më pas plotëson formularin e deklarimit të personit si të punësuar.

Ndjek afatet e përcaktuara me ligj për deklarimin e listëpagesës dhe gjeneron urdhërpagesën për kontributet dhe sigurimet shëndetësore dhe Tatimin mbi të Ardhurat Personale.

Sigurimet paguhen minimalisht për pagën 40.000 lekë bruto në muaj, të cilat llogariten në vlerën e 12 mijë lekëve në muaj. Edhe nëse punëmarrësi paguhet nën 35.520 lekë neto në muaj, gjithsesi kontributet do të paguhen në vlerën 40.000 lekë./Tv Scan