LIGJET E BIZNESIT
Përmirësohet situata në tregtinë e jashtme. Janari ka shënuar rritje të eksporteve, duke ndryshuar trendin negative të viteve të fundit, ndërkohë që rritja e importeve ka qenë thuajse e papërfillshme. Por të dhwnat e detajuara tregojnë se kjo rritje ka ardhur vetëm nga karburantet, pasi të gjithë grup mallrat e tjerë që eksportohen janë në rënie.
Sipas të dhënave të Institutit të Statistikave, muajin e kaluar eksportet e mallrave arritën vlerën 31 miliardë lekë, duke u rritur me 4.9 %, në krahasim me të njëjtën periudhë të një viti më parë dhe duke u rritur me 21,7 %, në krahasim me dhjetorin 2024. Ndërsa importet e mallrave arritën vlerën 60 miliardë lekë, me rritje 0.1 %, në krahasim me një vit më parë dhe duke u ulur me 23.5 %, në krahasim me dhjetorin e vitit që sapo u mbyll.
Defiçiti tregtar i këtij muaji është 29 miliardë lekë, duke u ulur me 4.5 %, krahasuar me të njëjtën periudhë të vitit të kaluar dhe duke u ulur me 45.4 %, në krahasim me dhjetorin 2024.
Kontributi i grupeve kryesore në eksporte
Gjatë muajit Janar 2025, në rritjen e eksporteve prej 4,9 %, kanë ndikuar grupet: “Minerale, lëndë djegëse, energji elektrike” me +13,0 pikë përqindje, “Ushqime, pije, duhan” me +0,5 pikë përqindje, “Makineri, pajisje dhe pjesë këmbimi” me +0,3 pikë përqindje. Ndërsa negativisht kanë ndikuar grupet: “Materiale ndërtimi dhe metale” me -5,6 pikë përqindje, “Tekstile dhe këpucë” me -2,3 pikë përqindje, “Produkte kimike dhe plastike” me -1,1 pikë përqindje etj.
Kontributi i grupeve kryesore në importe
Gjatë muajit Janar 2025, në rritjen e importeve prej 0,1 %, krahasuar me Janar 2024, pozitivisht kanë ndikuar grupet: “Minerale, lëndë djegëse, energji elektrike” me +1,67 pikë përqindje, “Ushqime, pije, duhan” me +1,65 pikë përqindje, “Produkte kimike dhe plastike” me +0,99 pikë përqindje. Ndërsa negativisht kanë ndikuar grupet: “Materiale ndërtimi dhe metale” me -3,3 pikë përqindje, “Makineri, pajisje dhe pjesë këmbimi” me -0,8 pikë përqindje, “Lëkurë dhe artikujt prej tyre“ me -0,14 pikë përqindje.
Tregtia sipas vendeve partnere
Në muajin Janar 2025, vendet me të cilët Shqipëria ka pasur rritjen më të madhe të eksporteve, në krahasim me Janar 2024 janë: Kosova (91,6 %), Greqia (2,0 %), Spanja (86,0 %), etj. Ndërsa vendet me të cilat eksportet kanë pasur uljen më të madhe, janë: Italia (17,7 %), Gjermania (1,6 %), Turqia (43,1 %), etj.
Në muajin Janar 2025, vendet me të cilët Shqipëria ka pasur rritjen më të madhe te importeve, janë: Italia (5,9 %), Kina (45,4 %), Greqia (2,1 %), etj. Ndërsa vendet me të cilat importet kanë pasur uljen më të madhe në krahasim me Janar 2024 janë: Turqia (9,1%), Gjermania (2,0 %), SHBA (55,5 %), etj.
Shkëmbimet tregtare me vendet e BE-së zënë 56,9 %, të gjithë tregtisë. Në Janar 2025, eksportet drejt vendeve të BE-së zënë 68,2 % të eksporteve gjithsej dhe importet nga vendet e BE-së zënë 51,1 % të importeve gjithsej. Partnerët kryesorë tregtarë janë: Italia (27,2 %), Kina (9,9 %), Greqia (7,7 %), Kosova (7,0 %).
