Ekonomia pa besim, pasojat tek qytetarët dhe bizneset

Nga Aurora Sulce, Producente Ekzekutive për Biznesin në A2 CNN

Ky vit nuk ka nisur i mbarë për një pjesë të bizneseve dhe konsumatorët. Ata kanë ulur besimin tek ekonomia dhe janë pesimistë për situatën ku ndodhen. Kjo ka rezukltuar nga vrojtimi mbi Treguesin e Ndjesisë Ekonomike, që publikohet nga Banka e Shqipërisë.

Në janar rezulton se bizneset pesimistë janë në sektorët e industrisë, ndërtimit dhe tregtisë, ndërkohë që besimi është me rritje vetëm tek shërbimet. Përjashtim nuk bëjnë as konsumatorët, të cilët gjithashtu kanë ulur besimin në këtë fillim viti.

Por cilat janë arsyet e kësaj situate tek biznesi dhe qytetarët?

Këta të fundit vlerësojnë problematike vlerësimet mbi gjendjen e ekonomisë; situatën financiare; situatën me punësimin dhe rritjen e pagave.

Por cilat janë pasojat e rënies së besimit tek biznesi, qytetarët dhe ekonomia në tërësi? Kjo duke pasur parasysh se paraja është besim.

Thënë ndryshe, një rënie e besimit, nëse vijon edhe në muajt e ardhshëm, shkakton pasiguri tek agjentët ekonomikë. Rrjedimisht, qytetarët stepen të konsumojnë dhe bizneset që të investojnë. Kjo con në ulje të konsumit dhe investumeve private dhe për pasojë, edhe në ngadalësim të ekonomisë.