Bujqësia pa kredi, qeveria mbledh bankat

Bujqësia është sektori më pak i kredituar i ekonomisë shqiptare, pasi konsiderohet me risk të lartë nga bankat. Të dhënat zyrtare tregojnë se për këtë sektpor jepet vetëm 1% e totalit të kredisë bankare, duke bërë që fermerët dhe agropërpunuesit të gjejnë financime kryesisht vetëm nga sistemi i mikrofinancës.

Aksesi i kufizuar në financë ka qenë një ndër problemet që është ngritur në vite me shumë forcë nga operatorët e tregut dhe ekspertët. Një thirrje që mesa duket, më në fund duket se ka arritur në “veshët” e qeverisë. Kjo pasi sot është njoftuar një tryezë diskutimi me temë “Kreditimi i Sektorit Bujqësor: Identifikimi i rrugëve dhe krijimi i instrumenteve për një progres cilësor në kreditimin e sektorit bujqësor”.

“Në ketë tryezë diskutimi do të marrin pjesë përfaqësues nga qeveria, drejtues të sistemit bankar dhe përfaqësues të shoqërive të agrobiznesit. Qeveria Shqiptare dhe Banka e Shqipërisë organizojnë këtë tryezë diskutimi – i cili përfshin të gjitha grupet e interesit – për të hedhur një vështrim të ri mbi pengesat që has kreditimi i sektorit bujqësor dhe për të identifikuar rrugët dhe instrumentet e duhura për adresimin e tyre. Konkluzionet e kësaj tryeze diskutimi do të shërbejnë për të ndërtuar një axhendë pune e cila do të krijojë premisat për një qasje të re të sektorit bankar ndaj kreditimit në bujqësi, duke mundësuar një hap cilësor në zhvillimin e këtij sektori”, theksohet në njoftimin e Bankës së Shqipërisë për mediat.

Në këtë aktivitet do të jenë të pranishëm kryeministri Edi Rama, guvernatori Gent Sejko, ministrja e Bujqësisë, Anila Denaj dhe ministri i Financave, Petrit Malaj.