A preket Shqipëria nga lufta tregtare e Trump? Flet investitori

Presidenti amerikan Donald Trump ka paralajmëruar vendosjen e tarifave për vendet e Bashkimit Europian. Me këto vende Shqipëria realizon pjesën dërrmuese të shkëmbimeve tregtare. Më saktësisht, 57.4% të totalit të tregtisë. Por a preket vendi ynë nga tarifat që mund të vendosë SHBA për bllokun europian?

Maksim Caslli, CEO i American Capital, investitor që prej shumë vitesh bën biznes me Shtetet e Bashkuara të Amerikës shpjegon se rritja e tarifave do të bëjë që cmimet e produkteve eruopiane të shtrenjtohen për konsumatorët amerikanë dhe kjo mund të jetë një mundësi, që këto produkte të zhvendosen për t’u shitur në vende të tjera, si Shqipëria.

“Nuk duhet të shqetësohemi, pasi nëse gjermanët nuk arrijnë të shesin produktet e tyre në Amerikë, do t’i shesin produktet në tregje të tjera. Njëkohësisht, nëse i rritet cmimi final i produktit, do të mundohen të ulin kostot, dhe ndoshta do të bënin spostimin e prodhimit në vende më të lira, si Shqipëria. Kështu, që mund të jetë një mundësi për Shqipërinë në këtë luftë. Plus, ne jemi aq të vegjël sa nuk impaktohemi”, ka shpjeguar Caslli.