Shqipëria pa fuqi punëtore, ja si po i zëvendësojnë bizneset të larguarit

Nga Aurora Sulce, Producente Ekzekutive për Biznesin në A2 CNN

Ekonomia shqiptare po vuan mungesën e fuqisë punëtore. Emigrimi i vazhdueshëm dhe i pandalshëm vitet e fundit, si dhe plakja e popullsisë ka futur në ngërç jo vetëm biznesin, por edhe sektorin publik, ku qeveria u detyrua të rriste pagat në përpjekje për të mbushur vendet bosh të punës.

Anketa e Barimentit të Ballkanit tregoi se 3% e bizneseve shqiptare po përpiqen t’i zëvendësojnë punëtorët e larguar me Inteligjencën Artificiale, ndërsa pjesa dërrmuese e kompanive po importojnë punëtorë nga jashtë, kryesisht nga India, Bangladeshi, Filipinet etj.

Kjo goditje që ka marrë tregu i punës ka ulur fitimet e biznesit, ka rritur kostot dhe ka tkurrur produktivitetin e ekonomisë. Por a është importimi i punëtorëve nga jashtë zgjidhje?

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern

Të dhënat zyrtare tregojnë se të huaj me leje pune në vendin tonë janë 9825 individë. Të dhënat e fundit zyrtare janë ato të vitit 2023. Kundrejt vitit 2022, numri është rritur me 1520. Por pavarësisht tendencës në rritje, të huajt me leje pune përbëjnë më pak se 1% të totalit të të punësuarve në vend, duke bërë që të jenë të papërfillshëm kundrejt kërkesave dhe nevojave të tregut.

Por cilët janë sektorët, ku janë të përqendruar më shumë punëtorët e huaj?

Të dhënat tregojnë se të huajt me leje pune rezultojnë kryesisht të angazhuar në akomodim dhe shërbim ushqimor; në ndërtim dhe tregti, duke lënë të pambuluar shumë sektorë të tjerë, ku ka nevoja.