Qeveria shlyen borxhet e rrugëve dhe largimeve nga puna, gati 1 miliard euro në në tri javët e para të janarit

Për investime të kryera e shërbime të marra por të papaguara, bashkë me vendime gjyqësore të vitit të shkuar e mallra të blerë për këta muaj…nga arka e shtetit në më pak se tre javë kanë dalë 96.7 miliardë lekë, me kursin aktual të k. gati 1 miliardë euro në më pak se tre javë.

“Ato që mendoj se janë specifika që kanë ndodhur në këtë periudhë janë politikat e rritjes së pagave të cilat detyrimisht japin një detyrim shtesë në buxhetet e institucioneve përkatëse. Ato projektet të mëdha infrastrukturore të cilat kanë mbetur pa u shlyer gjatë vitit 2024 e që shlyhen menjëherë tani”, thotë Eduart Gjokutaj, ekspert për ekonominë.

Të dhënat nga Ministria e Financave tregojnë se deri më 20 janar kanë dalë nga arka e shtetit 35.4 miliardë lekë apo 37 për qind më tepër para se në po të njëjtën periudhë kohore të një viti më parë.

“Nga ana tjetër, edhe politikat e ndryshme subvencionuese, të cilat shpesh janë në kuadër të qëllimeve elektorale e cila e ka konsumuar vet-veten tashmë, natyrisht që ka shtuar dhe ka çuar shpenzimet në këto nivele”, thotë Gjokutaj.

Për pagat, pensionet, ndërtuar rrugë, shkolla e ujësjellës, menaxhuar mbetjet apo për t’u mbrojtur nga zjarret e përmbytjet për këtë vit planifikuar është një buxhet prej  më shumë se 822 miliardë lekë. Ai është mbi 51 miliardë lekë apo 6.6 për qind se sa buxheti i vitit 2024 dhe 87 për qind më i madh se në vitin 2014. Por, me gjithë se më i madhi në histori, ai mund të harxhohet shpejt nëse ecet me këto ritme.

“Është një konstatim që bazohet mbi ato tregues që tashmë ekonomia po i reflekton. Po ka një lodhje të ekonomisë që po vjen si pasojë e shpenzimeve të cilat nuk p[o përkthehen në asete, por po mbesin si detyrime”, thotë Gjokutaj.

Ekonomia shqiptare po kalon ndoshta “ditët më të mira ndonjëherë”, por qeveria po kërkon të shtojë borxhet. Brenda marsit vendi pritet të dalë në tregjet e huaja për të marrë 600 milionë euro hua. Ministria e Financave ka nisur procedurat për një firme ligjore të specializuar në dhënien e konsulencës ligjore për emetimin e Eurobond-it./A2 CNN