LIGJET E BIZNESIT
Institucionet publike do të hyjnë në marrëveshje partneriteti me ndërtuesit, njëlloj si këto të fundit bëjnë me pronarët privatë. Kjo është nisma e re e prezantuar të enjten paradite në godinën e Kryeministrisë.
Programi quhet “Urat e reja për Shqipërinë 2030” dhe sipas asaj që Rama tha është i bazuar në praktikat më të mira europiane dhe në bashkëpunim me institucione simotra në Europë të Korporatës Shqiptare të Investimeve.
Adelina Greca, drejtore e Agjencisë Kombëtare e Planifikimit të Territorit, zbuloi se dy pronat e para të cilat do të zhvillohen janë ish-Parku i delegacioneve, që ndodhet pranë stadiumit “Selman Stërmasi” dhe ish-godina e Agjencisë Telegrafike Shqiptare, ku sot ndodhet Ministria e Mjedisit.
“Natyrisht që këto projekte do të vendosen përmes garave të hapura dhe që synojnë nga një anë t’i vënë në dispozicion shtetit hapësira të reja, me standarde europiane për aktivitetin e administratës publike dhe nga ana tjetër t’i japin mundësi sipërmarrjes që të bëjë biznes duke hyrë në një marrëdhënie me shtetin, si marrëdhënia që kryen përditë në fushën e ndërtimit me pronarët privatë”, tha Rama në fjalën e tij.
“Do të na fusë edhe ne në klubin e vendeve që këto praktika i kanë shumëvjeçare dhe të konsoliduara. Por nga ana tjetër, si rezultat, shteti nuk do të zhvishet nga pjesëmarrja në zhvillimin e peronës, duke humbur kështu mundësinë që të marrë përfitimet, por do të jetë aktor në bashkëpunim me aktorët e tjerë të tregut”.
Gjatë prezantimit u njoftua edhe çelja e garës gara për rindërtimin e stadiumit “Selman Stërmasi”. Faza e parakualifikimit përfundon më 24 janar, ndërsa faza e kualifikimit zgjat 60 ditë. Vlerësimi i projekteve do të bëhet nga juri ndërkombëtare. Do të jepen 5 çmime për idenë më të mirë të projektimit. 3 fitues do të kalojnë në fazën finale të ankandit dhe do të ketë 1 fitues të kontratës . Në përmjet këtij projekti do të mundësohet rijetësimi i stadiumit aktual në stadium të standardit 4 të UEFA-s. Mundësohet rikualifikim i zonës rreth stadiumit dhe rikonceptim i hapësirave urbane për përdorim publik dhe përdorim privat. Gjithashtu ftohen pronarët privatë që t’i bashkohen nismës së Korporatës Shqiptare të Investimeve (AIC). Për projektimin dhe zhvillimin e zonës urbane të stadiumi “Selman Stërmasi” ftohen arkitektë, zhvillues apo investitorë vendas dhe të huaj.
Në një sipërfaqe prej 6 hektarësh, në ish-zonën ushtarake të Farkës në Tiranë, vendi do të ketë një qendër panairesh. “Expo Business Albania” do të jetë një hapësirë e dedikuar për evenimente, panaire, koncerte dhe takime, njëherazi edhe si strukture akomoduese pasi parashikohet të ndërtohen edhe hotele me 3 apo 4 yje.
Biblioteka Kombëtare do të ndërtohet te ish-Garda e Republikës te Parku i Liqenit. Do të integrojë edhe Librarinë e Tiranës. Do të shërbejë edhe si hapësirë leximi, veç se si “depozitë” për librat.
