Mbi 3 mijë qytetarë në vit zhvillojnë procedura gjyqësore për njohjen e viteve të punës që u kanë humbur gjatë periudhave që punonin në kooperativat apo ndërmarrjet bujqësore. Por tashmë me projektligjin e ri këto gjyqe do të ndërpriten ndërsa edhe kategoria përfituese do të zgjerohet. Në komisionin e ligjeve drejtori i Institutit të Sigurimeve Shoqërore bëri të ditur qytetarët që s’do munden të përfitojnë nga kjo nismë.
“Do u njihen qytetarëve që mbushin moshën e pensionit kur miratohet ligji, dhe atyre që janë në procedura gjyqësore. Ata të cilët kanë dalë në pensionin kanë shkuar në gjykatë apo se kanë ndjekur rrugën gjyqësore s’do të njihen. Se përndryshe do llogaritej të rishikoheshin për 720 mijë pensionistë”, deklaroi, drejtori i Institutit të Sigurimeve Shoqërore, Astrit Hado.
Por cilat raste do të merren në shqyrtim për njohjen e viteve të punës?
“Projektligji synon efektet e mbartura si rezultat i problematikave në lidhje me njohjen e vitet e punës na rastet kur ka mungesë të plotë të të dhënave, të dhëna të pjesshme apo të korrigjuara, identitete të pasakta, fletë të dëmtuara etj. Miratimi do të mundësonte njohjen e periudhave të sigurimit, do të mundësonte përfitimin e një pensioni sa masa e pensionit social”, tha zv.ministrja Olta Manjani.
Janë 7500 persona që kanë punuar në ish kooperativat bujqësore që do të përfitojnë dhe 22 mijë të tjerë në ish ndërmarrjet bujqësore dhe ndërmarrje shtetërore. Kostoja e projektligjit në vitin e parë të zbatimit pritet të arrijë në 40 milionë lekë.
